Actualmente e tata cu ta acusa di a maltrata su baby di dos luna ta deteni den cel na warda di polis. Esaki ta di acuerdo cu e prome fase di detencion cu a tuma luga. Na final di cada fase ta analisa e investigacion y ta wak si e ta na su luga pa e persona keda deteni.
Si esey ta e caso, despues di e 8 dianan cu e tin pa keda cera actualmente e lo bay keda den detencion na KIA, den e departamento di caso na unda cu ainda investigacion ta andando, Segun Sra., Ann Angela di Ministerio Publico. Bon Dia Aruba a puntra OM kico e tata ta wordo acusa di a comete aworaki y si ta considera intento di asesinato. El a splica cu te ainda e ta un caso di maltrato severo contra di un baby.
Logicamente si e tata wordo condena y lo mester sinta su castigo na KIA, autoridadnan mester considera un psicologo den e caso aki, pasobra segun informacion no ta prome biaha cu e homber aki ta bati un mucha malamente. Algo cu un hende cu mente sano no ta haci y KIA no ta ofrece suficiente guia pa un persona cu problema mental.
Ultimo desaroyo salud baby
Indicacion cu nos matutino a ricibi cu e baby cada dia ta birando mas miho segun fuente di confiansa cerca di e mama di e baby. Diadomingo gips a wordo poni, cual e tin cu keda cun’e 10 dia pa wak despues con tur cos ta bayendo y con su wesonan ta desaroya.
