E mercado nobo pa obliga nan casa na China. Muqadas Ashraf tabata tin 16 aña ora su mayornan a mand’e cu un homber Chines, cu a bin Pakistan pa busca un muhe pa casa cune. 5 luna despues, Muqadas a bay bek su pais, na estado y buscando divorcio, pasobra su casa ta uno abusivo.
Ahsraf ta un di centenares di mucha Cristian cu a ta wordo trafica pa casa na China, e negoshi ta creciendo e ultimo añanan. Esunnan cu ta encarga cu negoshi ta para pafo di nan misa pa busca e miho potencial. Nan ta wordo yuda pa esunnan di e misa, pa asina nan por papia cu e mayornan di e mucha muhe, primintiendo placa a cambio di nan yiunan.
Mayornan ta ricibi miles di dollars y ta pensa cu nan yerno ta rico y a converti na Cristianismo. E esposonan ta resulta di ta niun di dos, segun varios di e victimanan, nan mayornan, activistanan, pastoor y oficialnan di gobierno, tur cu a papia cu AP. Unabes na China, e muchanan muhe – mayoria casa contra nan boluntad – por haya nan mes aisla den regionnan rural, vulnerabel pa abuso, sin por comunica, y dependiendo di un app di traduccion pa sikiera un glas cu awa.
“Esaki ta traficacion di hende, mi a papia cu algun di e muchanan aki y nan ta hopi pober, codicia pa placa ta responsabel pa e casamento aki”, segun Ijaz Alam Augustine, minister di minoria y derecho humano na provincia di Pakistan.
Augustine ta acusa gobierno di China y embahada di Pakistan di cera nan wowo den caso asina, sin puntra pa visa of documento.
AP a reuni cu miles di e muchanan muhe pa nan por splica. Segun Muqadas ta bisa cu ta ‘un fraude y mentira, tur e promesa cu nan ta haci ta falso’.
Oficina di derecho humano a yama China y Pakistan pa tuma accion y termina cu e trafico. Embahada di China a bisa cu lo coopera pa asina termina cu e centro cu ta responsabel di esaki.
Ta kere cu entre 750 pa 1000 mucha muhe a wordo obliga pa casa, segun Saleem Iqbal, un activista Cristian. E hombernan cu ta pidi casa, mayoria ta trahado den proyecto di infrastructura na Pakistan, algun otro ta pa e network cu nan tin cu e pais.
Segun e hombernan aki ta bisa cu lo paga tur e gasto di casamento y lo paga entre 3,500 pa 5,000 dollar, pero mayornan di e mucha muhenan aki, manera Muqadas, ta bisa ningun ora a ricibi un pago. “Mi a kere e lo haya un miho oportunidad den bida, miho pa nos tambe”, e mama a bisa.
Segun pastoor Munch Morris, e ta conoce algun pastoor cu ta traha cu e grupo, anto nan comentario ta ‘Dios ta contento cu e homber ta converti na Cristian’, y cu nan ta yuda esunnan pober, pero nan tur sa cu ta djis haci e pa placa, y no pa yuda ningun hende.
Mayoria di e muhe, ora nan yega China ta priminti un miho bida, pero manera den e caso di Muqadas, tabata biba den un cas chikito cu un camber y baño. Su casa no tabata lag’e sali y tabata maltrat’e.
