Muchanan mester keda un prioridad den dianan di fiesta

Nos ta den pleno dianan di celebracion di Pasco y Fin di Aña, muchanan ta cu vakantie unda nan ta haya hopi tempo liber pa disfruta den dianan aki pero tambe nan mester keda un prioridad vooral riba nan siguridad y bienestar.

Ta p’esey cu Fundacion Respeta Mi cu ta enfoca riba prevencion di abuso sexual y otro forma di abuso for di aña 1991 ta ofrece cierto informacion pa comunidad den dianan aki ora hendenan ta desea otro feliz dianan di fiesta pero ta importante pa realisa cu no ta den tur hogar tin felicidad den dianan aki.

Tin muchanan cu ta experencia teror na man di personanan cu mester stima nan y cuida nan. Pa e motibo aki nan ta pidi un bes mas pa bay poco poco y “celebra” di forma consciente. No ban laga e dianan aki bira un experencia traumatico pa nos muchanan y pa nos mes como adulto.

Tambe kier para keto na personanan cu tabata victima di abuso durante temporada di fin di aña, “Pa boso e epoca aki no ta facil, nos ta reconoce boso lucha y ta desea boso forsa tambe den e dianan aki” nan ta indica.

Tur mucha ta mustra respet y afeccion na un manera diferente. Ora ta wordo obliga e muchanan pa haci algo contra di nan boluntad, ta duna e mensahe cu e muchanan no tin control di nan mesun curpa. Esaki ta traha contraproductivo pa loke ta trata prevencion di abuso di mucha, naturalmente muchanan mester mustra respet. Mescos cu adultonan mester mustra muchanan respet tambe.

Tin mucha cu gusta duna brasa y tin mucha no cu como adulto tin cu respeta esaki. Pa loke ta trata ‘sintamento den scochi’, preferiblemente laga muchanan sinta ariba un stoel, ta comprendibel cu tin situacion caminda muchanan lo pidi mayornan pa nan sinta den nan scochi (specialmente muchanan mas chikito). Esaki mag semper. Ta ora e mucha ta indica, tanto verbalmente y cu lenguahe di curpa cu e ‘NO kier’, e ora ey mester respeta esaki.

Sacamento di potret tambe ta uno importante, muchanan ta depende di nan mayornan pa proteha nan, potretnan di muchanan tin ora ta wordo comparti ariba medionan social sin cu nan mes sa. Unda e fundacion ta recomenda pa por fabor ban sea mas critico pa loke ta trata informacionnan di e muchanan cu ta wordo comparti (inconscientemente) online.

Kisas comparti un potret ariba medionan social ta mustra inocente, pero no sa nunca ken por maluza e potretnan di e yiu y usa informacionnan cu ta comparti pa yega na e muchanan, cu mal intencion.

Tambe nan ta recomenda cu ora un mucha ta sinti incomodo, puntr’e kico ta pasando y yud’e, si e mucha mester keda cu un otro persona, mayornan mester percura p’e ta un adulto di confiansa.

No laga ni un mucha hunga su so sin supervision, e ta tuma un par di seconde pa haya un experiencia traumatico pa nan.

Aña 2022 ta yegando na su final, asina cu fin di aña yega por cuminsa sinti e hendenan druk y presiona. Tin ora nan lo ta asina ocupa cu nan no ta ni para keto na loke cu nan ta sinti na e momento ey. E celebracion di fin di aña ta algo hopi personal. No tur famia ta haci esaki na e mesun manera. Tur famia tin nan mesun tradicion y custumber. Pero toch hopi famia por relaciona algo cu otro. Algo cu tur hende lo cuminsa sinti, mayoria biaha inconscientemente, ora nan ta bou di hopi presion di algo. Y esaki mas cu claro ta stress.

E periodo aki por causa stress familiar, den dianan di fiesta e presion ta halto pa casnan ta nechi drecha, pa tin cuminda na abundancia, pa bisti y luci bunita…pero esaki ta loke realmente ta importante durante temporada di fin di aña?

Esaki ta depende di e norma y balor di cada persona. Tin hende ta duna hopi balor na regalo. Of tin hende simplemente ta aprecia regalo. Muchanan hopi biaha ta bira contento ora nan haya un co’i hunga nobo cu ta importante pa e desaroyo di nos muchanan, pero esaki ta mas importante cu interaccion entre mucha y mayor, cuidador of educador? Co’i hunga ta algo pasahero, pero charlanan cu bo tene cu un mucha lo por keda graba pa semper den mente di un mucha. Naturalmente esaki ta depende di e edad di e mucha tambe. Un mucha di 3 aña no ta bay keda corda un combersacion compleho y filosofico.

Pero interaccion ta importante y necesario di baby caba. Atencion ta importante pa e mucha por desaroya, vooral si e ta haya esaki for di personanan cu e stima y confia. Asina no neglisha e momentonan bunita durante fin di aña.