Avion Hurricane Hunter Hercules ta bishita Aruba
ORANJESTAD – E Tour di Conscientisacion riba horcan den Caribe ta den marcha, y varios cientifico di NHC ta biahando rond di Caribe cu e tripulacion di e avion Hurricane Hunter WC-130J di USAF.
Cu e temporada di horcan 2019 cu ta acercando, e expertonan di horcan di e Administracion Nacional Oceanico y Atmosferico (NOAA), ta biahando den e avion di Reserva di Horcan WC-130J di USAF hunto cu e avion di NOAA Lockheed WP-3D Orion, pa asina alerta riba e impactonan di ciclonnan tropical y e peliger di ta den un calamidad sin tin un plan personal di horcan y di ta prepara pa mal tempo, na momento cu e temporada di horcan cuminsa na Juni.
E biaha aki, Aruba ta na turno pa ricibi un avion di e tipo aki y su tripulacion na nos aeropuerto. Mirando e tempo cortico cu e avion lo por keda na Aruba, Minister Chris Romero a invita un grupo di muchanan di scolnan MAVO, pa asina nan experiencia di cerca un avion cu ta drenta den horcan, esta un Hurricane Hunter.
E bishita na Aruba di e aeronave aki y su tripulacion, ta duna nos e oportunidad di siña y compronde con cientificonan ta recopila tur informacion di horcan y con nan ta manda esakinan den tempo real via satelite for di e avion directamente pa e Centro Nacional di Horcan di NOAA. Na e centro aki ta uza tur informacion recopila y analisa esaki pa asina esunnan cu ta pronostica e tormentanan tropical por mantene e paisnan afecta debidamente informa.
Segun NOAA, aeronavenan specialmente ekipa ta hunga un rol integral den pronostico di horcan. Data colecta durante horcan pa e stacionnan meteorologico aereo aki ta yuda pronosticadonan haci pronostico precies durante un horcan, y yuda investigadonan di horcan haya un miho comprension di e proceso di e tormenta, mehorando asina nan model di pronostico.
