Den un conferencia di prensa cu Gobierno di Aruba a ofrece pa comunidad, Vanessa Tjon Kock di Cuerpo di Polis a manifesta cu ‘den e toque de queda e actuacion di polis no ta bay ta esun di mas suave’ y cu muchanan den edad di 12 pa 15 aña por haya boet.
El a declara cu polis na e momento ey tin e autoridad pa hala e persona for di caminda, para e persona y puntra kico e ta haci riba caminda.
“E momento cu tin detencion ta pasobra nos ta autorisa pa e leynan stipula conhuntamente cu Ministerio Publico pa por detene e persona”, el a sigura.
Asina mes, el a bisa cu den medionan social a bin dilanti criticanan tocante muchanan menor di edad. Tocante esaki el a splica cu tur loke ta trata menor di edad di 12 aña of menos, na e momentonan ey no lo haya un boet, pa motibo cu nan ta wordo considera como mucha. Hoben di 12 aña te cu 15 aña lo haya un boet, den e caso aki no ta trata di e suma di 1.000 florin pero si un parti di esaki.
El a menciona cu e parti aki mester discuti cu un fiscal y tur loke ta edad mas halto di esaki, cu ta drentando caba den un edad di adulto,, si lo haya e boet di 1.000 florin. Ademas, el a comenta cu no lo haya diferencia si na e momentonan ey e tabata cu un adulto of no.
“Bo no tin nada di haci riba caminda den oranan di toque de queda si bo no tin e permiso pa ta riba caminda”, Tjon Kock a expresa.
Di loke ta trata medionan di prensa, el a bisa cu tin acuerdo haci cu medionan di prensa y tambe cu miembronan di cuerpo policial. Di esaki, el a sigura cu medionan tin permiso di banda di polis pa laga nan ta forma parti di e toque de queda pero, e cooperacion no solamente mester bin di cuerpo policial sino tambe di medionan di prensa, cu mester comprende cu na e momento cu nan a haya e permiso pa nan forma parti di toque de queda nan mester cumpli cu e reglanan.
