Diadomingo di Pasco di Resureccion a tuma luga un actividad pa abastece di awa y cuminda un poblacion situa apenas 281 kilometer fei di nos costa. Ta trata di e poblacion indjan Wayuu estableci na Guajira parti noord di Colombia, unda varios muchanan a fayece pa causa di hamber y sed.
Pa atende cu e necesidad humanitario aki, fundacion Valeria “Todo Por Amor Aruba” a organisa un actividad fei 9’or di mainta te cu 9’or anochi cu a conta cu e sosten di e pueblo generoso di Aruba.
Indjan Wayuu
Sra. Desiree Correa y sr. Emilio Castañeda di e fundacion Valeria a expresa nan palabra di gratitud na tur esunnan cu a contribui cu awa, cuminda, cos hunga y paña pa e muchanan Wayuu. E iniciativa aki cu a conta cu sosten di diferente instancia y medio di comunicacion a nace ora cu a wordo conoci via canal di television internacional riba e situacion di e indjan Wayuu.
Sra. Correa a bisa cu e no ta papiando di e localidad di Maicao of Riohacha, sino specificamente di e “rancherianan” of pueblonan indjan. E mes tin un laso familiar cu e region aki, ya cu su tata tabata di Guajira. Ora cu el a wak den noticia e situacion penoso aki e cos aki a dal’e hopi duro. El a bisa cu ya sea unda bo ta nace of unda bo por studia, bo no por lubida bo rais.
“Esaki ta mi rais La Guajira. Mi tata ta di Riohacha”, el a bisa. Sra. Correa ta considera mas cu claro cu el a sinti un sorto di obligacion pa yuda alivia den e situacion aki. Sinembargo el a lamenta cu apesar cu na Aruba tin hopi hende di Guajira masha poco di nan a bin contribui cu un boter di awa.
“Nos a haya conocemento di con tristo e situacion ta pasobra nan no tin awa potabel”, el a bisa. Pues e tabata un situacion latente cu a haci cu sra. Correa como miembro di e fundacion Valeria “Todo Por La Vida Aruba” y su presidente, sr. Castañeda a cera cabes pa atende cu e necesidad di e muchanan Wayuu cu ta muriendo na Guajira. “Nos no ta papiando di hende grandi sino di baby”, asina hopi conmovi sra. Correa a bisa na Bon Dia Aruba.
E plan tabata uno cla esta “ban pidi awa” y p’esey e campaña a carga e nomber contundente: “Agua para el niño Wayuu”. Nan meta tabata 10 mil boter di awa y danki na Dios y na e generosidad di nos hendenan, nan a yega di surpasa e cifra aki. “Tremendo reaccion di Aruba. Nos no por keha!”, el a bisa.
Transparencia
Sra. Correa a declara cu e actividad aki ta uno di fundacion pa fundacion sin intervencion di niun gobierno, ni esun di Colombia ni esun di Aruba pa evita despues cualkier mal comentario.
Ta asina cu fundacion Valeria a cera un aliansa cu fundacion “Por La Sonrisa de un Niño” cu sede na Guajira pa asina canalisa di forma transparente e ayudo vital aki pa e poblacion infantil di e indjan Wayuu. El a bisa cu e fundacion Por La Sonrisa de un Niño” bou direccion di sra. Teresa Torres ta uno confiabel y hopi serio.
“Meneer laga mi splica un cos bon cla. Nos ta bay distribui. Nos di fundacion Valeria ta bay Riohacha. Nos ta bay haci encargo di tur e awa y pasa den tur e rancherianan pa entrega e awa. Nos no ta bay lage den man di niun hende…”, asina categoricamente el a bisa.
Pa transporta e cantidad di awa cu ta pisa hopi tin dos opcion riba mesa: Un via aereo cu un avion di e Forsa Arma di Colombia, y e di dos via barco. Sinembargo e prome opcion ta dificil, ya cu ta trata di un avion militar y e tin cierto procedura cun’e prome cu e avion aki lo por aterisa na Aruba. E opcion di transporta e ayudo aki via barco ta mas factibel y sigur. Nan tin pensa di transporta e ayudo aki diabierna awor pa Guajira, unda lo tin presencia di miembronan di fundacion Valeria y fundacion Por La Sonrisa de Un Niño, y ademas di miembronan di prensa local y di Colombia cu lo duna cobertura na e acontecimento aki.
Fundacion Valeria
Sr. Castañeda a bisa cu fundacion Valeria a nace 4 aña pasa y e ta carga e nomber di su yiu muhe di 7 aña kende a wordo diagnostica cu un problema di “thyroid” cu a ocasiona cu el a bira obeso, y nan ta percura pa e no come mucho y evita asina cu su curason lo por para. “E soño di Valeria ta di bira rico pa cumpra cuminda pasobra e ta come hopi tiki pa motibo di su dieta. Valeria ta kere cu e ta come tiki pasobra no tin cuminda pa e come…”
Sr. Castañeda a resalta cu un echo cu a touch e curason tin hopi hende tabatin di haber cu e soño di un mucha Wayuu kende a bisa cu su maximo deseo of soño tabata esun di come kellogg. Mientras cu bo ta puntra un mucha na Aruba kico e lo desea, y sigur e lo bisa bo cu e lo kier bay Disney World, of e kier un tablet of un iphone, menos cu e kier come kellogg.
Fundacion Valeria ta un instancia sin niun meta financiero cu ta brinda su ayudo na e poblacionnan mas vulnerabel manera nos muchanan y nos grandinan, pero tambe esun cu limitacion y e mamanan soltero cabes di hogar. Tur fin di siman nan ta traha sopi pa yuda entre otro e adictonan cayehero, etc…
Na final sra. Correa y sr. Castañeda a expresa nan palabra di danki na tur hende cu a contribui cu e obra noble aki
