Mucha ta sangra pa tres siman y ainda no a haya solucion

ORANJESTAD – Manera ta conoci , tin caso cu mester evaluacion di pashentnan cu mester bay den exterior pa tratamento di malesa. No tur ora esaki ta bay lihe, dependiendo e caso y estado di e pashent. Bon Dia Aruba a mira e caso di Shadiënskah ‘Shady’ Janzen.

E mama di Shady, Jedina Romero ta splica cu su yiu, kende tin 7 aña di edad, tin 4 luna ta sufri di sanger cu ta sali for di nanishi, dolor di cabes, vision ta wazig, dolor y stick na su horea. Ora su nanishi ta sangra, e boca tambe ta yena cu sanger cu ta pasa robes. Cada dia e ta mas debil cu dolor den su ‘joints’ cu ta haci ‘casi imposibel pa e cana riba su mes’.

Segun e mama, e ultimo 2 siman e ta yora anochi cu tin un zonido di lek den su horea cu ta sinti cayente na full su cabes. Sra. Romero ta bisa cu a bishita dokter di cas, a haya dos diferente medicina pa alergia y test cu a haci pa wak si ta dengue of meningitis, cual ambos a sali negativo.

Sinembargo, e ta agrega cu a sali afo cu ‘el a haya anemia’. Despues cu e pareha di sra. Romero a zundra den oficina di dokter di cas, a logra haya un carta (verwijsbrief) pa asina por bay specialista KNO (garganta, nanishi y horea) y specialista di mucha. Pa ambos specialista tin un lista di espera. For di januari cu a bay e KNO, a haya afspraak na maart.

Sra. Romero ta bisa cu Shady su sangramento di nanishi ta dura mas cu 1 ora. “Un dia nos a wak e ta bayendo flauw, nos a yama ambulance, pero a bisa nos cu no ta busca pashent pa sangramento di nanishi. E ora nos mes a hib’e SHE hospital.”

Na hospital, sra. Romero ta remarca cu nan mester a warda 45 minuut ‘manera nada no ta pasando, mientras cu Shady ta sangra pa 2 ora’. Segun sra. Romero ta bisa cu ora nan a drenta pa controla, e zaalarts a bisa e mama cu ta bon cu el a pone ijs, y pa dialuna e bay su dokter di cas, pa motibo cu presion di Shady ta bon.

Sinembargo, sra. Romero a sali for di SHE pa bay e specialista KNO cu tabata na warda. “Nos a haya afspraak pa 12or di merdia, e ora ey tabata 9or di mainta. Nos a keda warda y Shady a cuminsa sangra atrobe. Ora nos a haya beurt pa atende Shady, e specialista KNO a kima un ader cu algo manera un suafel, anto el a bisa cu Shady no lo sangra mas, pero por lag’e weekend riba cama.”

Sra. Romero ta bisa cu esey a wordo haci diabierna, y ya pa diadomingo Shady a cuminsa sangra bek. Ambos banda di nanishi, pero un mas cu e otro. Nan a bay bek dokter di cas y KNO, pero atrobe cu lista di espera. E ta remarca cu diabierna a yega atrobe, y nan a haya un ‘spoed afspraak’ (cita di emergencia) cu un otro specialista KNO cu a trata cu Shady cu urgencia den su kantoor.

“E specialista aki no tin curason. Den Shady su nanishi, cu ainda no tabata tin ni un siman cu el a wordo kima pa e otro specialista, esaki a prop algo pa verdoof, Shady tabata grita y sclama cu e ta haci dolor. E specialista a lazer e parti paden di e nanishi. Cu e curason den mi man, cu speransa cu esaki lo yuda Shady mehora, pero no tabata e caso, Shady a sigui malo”, sra. Romero ta splica.

Segun sra. Romero a bay sinta na specialista di mucha e dialuna siguiente pa mas yudansa. E dokter a ordena pa un CT scan ‘di biaha y algun test di sanger’. E ta remarca cu e pensamento di cu Shady por tin un ‘stollingsziekte’, malesa di coagulacion.

Nan a haya afspraak y haci e CT scan pa e dia siguiente mes. E ta continua splica cu ora keda cla, a bay specialista di mucha, kende a splica cu resultado lo dura 6 siman. Tanten lo duna un afspraak pa fin di luna di februari. E ta agrega cu Shady no a haya ningun medicina ‘con haci nos no sa, y tabata resa pa pidi Dios un milager’.

Sinembargo sra. Romero ta bisa cu despues di 2 siman y desespera, su pareha a bay kinder poli pa asina haya atencion di e specialista di mucha. “Dr. Arends si a atende nos di biaha y duna receta pa 2 remedi pa alergia y vitamina di hero pa sanger, mirando cu e tin anemia. Tambe el a ordena pa nos test Shady di nobo na laboratorio, y pa laga Shady cu e KNO dokter pa haci un investigacion nobo. “

Sra. Romero ta agrega cu Shady a cuminsa yora y pidi pa no laga ningun specialista KNO pa mishi cune, ‘pa motibo cu e ta sufri y toch no ta yud’e’. Sinembargo sra. Romero ta bisa cu e dokter di mucha, respetando e ‘trauma di Shady’, a pidi pa cumpli cu e test y medicina, y pa bolbe den 3 dia pa resultado.

E dia di haci e test na laboratorio, sra. Romero ta remarca cu na hospital ta ‘out of stock’ di e material necesario. “Pa motibo cu no tin, mester a bay bek e dokter di mucha, eynan el a haya cu ta di mas, y nos dilanti el a e-mail AZV pa manda Shady exterior. Di e dia ey pa awe, tin 3 siman y nos no a tende nada. Dokter di mucha si ta follow up cu Shady pa motibo cu ta sorprendi cu nada no a ser haci pa yuda Shady.”

Segun sra. Romero, como mayor di Shady a bisa e dokter cu lo cuminsa haci un recaudacion di fondo of kico cu ta, pa motibo cu a warda di mas caba.

Pa cualkier colaboracion of donacion cu kier haci pa e caso di Shady, sra. Romero ta bisa cu tin box na diferente luga, Tat Fat, Eagle Convinience Store, Silla Bar, Manuelitos Bar, Rullys kiosk na retonde mahuma, Print Media, Texaco Sasaki, Sea Salt, Casa Del Mar, Authentic Cigars of por manda na cuenta di banco Jedina Romero Acc # 620.047.08 CMB

Bon Dia Aruba a puntra sra. Romero si a tuma contacto AZV pa mira con a para cu e caso. E ta contesta cu un amigo di nan cu tin kennis a bisa cu AZV ta cana segun nan leynan. Riba pagina 32 di edicion aki, por mira e contesta di AZV tocante e caso aki.