Ayera a wordo celebra Dia Mundial di Fotografia. Un fecha cu ta aparece riba e calendario mundial di acontecimento pa conmemora e di 177 aniversario cu e gobierno Frances a cumpra e patent di e mashin di saca potret for di Louis Daguerre. Despues nan a ofrece e invento aki como un regalo gratis pa henter mundo por a tin acceso na dje.
For di cu e mashin di saca potret a wordo inventa, episodionan importante di nos historia contemporaneo a keda inmortalisa pa medio di imagennan. Un di nan a sosode dos dia prome di e conmemoracion aki. Un atake aereo contra e bario Al Katerji di Aleppo na Siria a keda registra caminda e imagen di un mucha di apenas 4 aña a mustra e horor cu guera ta trece cune.
E palabranan ta bira pober pa describi e cara di tristesa y resignacion di e mucha Omran Daqneesh paden di un ambulance. E imagen aki di Aleppo Media Center cu awendia ta conmove henter humanidad, ta papia mas cu mil palabra. E ta mustra e mucha cu su curpa yen di stof y su cara na sanger, producto di e bombardeo cu a tuma luga den su ciudad natal.
E caso di Omran no ta uno excepcional, ya cu e ta wordo presenta den paisnan cu ta escenario di tur sorto di conflicto ya sea politico, ideologico, racial, social, religioso, etc…, unda e muchanan ta e poblacion mas vulnerabel.
E biaha aki e imagen di Omran cu ta wordo divulga den social media ta refleha e berdadero cara cu e guera tin.
