Alysha Kock ta un hoben di 14 aña di edad ken lamentablemente na aña 2022 a haya un diagnostico medico inespera. Su tata Eugene Kock a conta Bon Dia Aruba con e ta bin luchando tanto pa su yiu por haya un miho calidad di bida na otro pais, como tambe pa Alysha haya e tratamento lo mas pronto posibel.

Den un combersacion cu Eugene Kock, el a splica cu Alysha ta un mucha muhe di 14 aña cu ta bataya cu e malesa di Multiple Sclerosis (MS), cual ta un malesa cronico cu ta afecta e sistema nervioso central. Lamentablemente no ta existi un tratamento specialisa na Aruba pa por trata MS akinan, specialmente pa Alysha, cu ta un mucha y ta algo hopi delicado pa trat’e, solamente na Hulanda por haci esey, segun specialistanan cu a trat’e na Aruba a indica.

Na 2022 e mester a bay cerca un dokter debi cu a presenta cierto sintoma cu no tabata normal pa un mucha: dolor di cabes, e tabata marea, a cuminsa wak dobel, entre otro. Na hospital a logra haci diferente test sin cu por a haya kico tabata e origen di e sintomanan aki. Un di e resultadonan a bin for di Hulanda, unda tabata indica e diagnostico pa Alysha. “MS ta cu bo mesun sistema den bo curpa ta bringa cu bo nervionan, debi na esey tin hendenan cu ta keda den rolstoel,” Kock a sigura.

Kock tambe a señala cu e hunto cu Alysha tin un aña cu a cuminsa e caminda largo di por hiba Alysha na Hulanda back, pa motibo cu ora AZV a manda nan, specialista di Erasmus na Rotterdam den un carta a recomend’e pa nan keda bibando na Hulanda, ya cu eynan Alysha por tin un miho cuido, un miho terapia y clima tambe por alivia su bida pa cu su enfermedad.

Recientemente AZV a acerca Kock solicitando e carta aki, pa asina wak te na unda posiblemente nan por yuda nan den e caso aki; ainda Kock ta wardando riba un contesta.

“Pero aworaki mi ta sigui lucha pa mi mes hiba Alysha Hulanda di e manera con e pueblo di Aruba ta bin sosteniendo nos,” el a bisa.

Riba e pregunta con Alysha ta na e momentonan aki, el a sigura cu Alysha ta “hopi kibra, e ta hopi preocupa y mi a skirbiel’e riba Facebook tambe pasobra e ta puntra mi ‘Papi ki dia nos ta bay Hulanda? Dicon papi ta tardando? Papi mi no kier bira malo mas.”

Tanten cu Alysha ta preocupa y ta asina nervioso, su tata tambe ta sinti mesun cos y hasta mas di scucha su yiu; pero loke el a afirma si ta “cu nos ta casi logra.”

Kock tin e conviccion cu pa september nan por logra subi avion danki na donacion cu nan a haya y na un campaña cu George Winterdaal a haci. Ademas, na juli ultimo tambe a logra haci un evento grandi pa asina por recauda fondonan na parkinglot di Scol Cacique Macuarima.

“E evento tabata asina exitoso cu mi no tin palabranan pa gradici tur e hendenan cu a duna un man. Sinembargo, no a cera e suma cu nos tin mester. Pero toch mi ta keda purba y mi ta keda persisti te ora cu mi yiu subi avion,” Kock a afirma.

Pero e caminda no ta facil. Kock a informa cu e ta un empleado publico cu a solicita bay cu VUT pa asina por yega na e meta cu ta bay biba Hulanda cu su yiu. Sinembargo, recientemente a haya un carta di DRH indicando cu e mester warda tres siman pa nan por studia su caso y por dun’e un contesta. Pero e caso aki no ta algo pa warda, ta pa un mucha di 14 aña por haya un calidad di bida.

El a acerca ministernan tambe, segun el a splica, sin por haya contesta di niun di nan tampoco y asina mira e posibilidad di haya un ayudo.

“Ni un minister no kier atende mi, ni a acerca mi pa por lo menos bisa mi cu mi por bay Arubahuis y mi por keda trankil, ni un di nan, loke ta haci e situacion hopi fastioso pa mi,” el a bisa.

Mientras tanto, dia 1 di september Kock mester haya un suma di placa di un otro evento cu ta organisando na Centro di Bario Noord for di 11am te cu 3pm y esaki ta nifica e “last lap” pa asina nan por subi avion y cuminsa for di cero, debi cu segun e mes a señala, nan no tin famia na Hulanda.

“Importante ta pa ora nos yega mi comunica cu specialistanan, pasobra nan ta pura pa Alysha yega, debi cu e pildonan cu Alysha ta hayando cu tin e malesa bao control, e dokternan kier control’e y wak con esey ta bayendo. E pildonan ta asina fuerte cu nan tin miedo cu otro organonan di su curpa por daña,” el a afirma.

Esey ta e motibo pakico Kock tin urgencia di por bay Hulanda lo mas pronto posibel cu su yiu y p’esey den ultimo aña e ta bin pidiendo ayudo di comunidad di Aruba pa pone un man den curason y por yuda Alysha bay biba cu un tratamento adecua.

“Mi ta kere ami ta e unico tata cu a haci hopi lucha den caso aki pa su yiu, pero ta uno cu mi no ta drumi tanten mi yiu subi avion. Mi yiu ta cay bao mi, e ta biba cu mi y a mi ta wak kico ta pasando cune, a mi ta weita su enfermedad y su preocupacion cu solamente 14 aña di edad cu bo mester biba un bida normal,” el a finalisa.

Si algun persona ta interesa di yuda Alysha por haci un donacion na CMB #63121306 Eugene Kock cu e comentario ‘Coopera pa Alysha Recupera’ Of por bay riba e link di gofund.me https://gofund.me/d23ca13b