Un mucha homber di 2 aña, cera den detencion, kier pa nan carg’e tur ora. Mucha muhe den edad di 10 pa 15 ta bisa cu nan ta haci nan best pa dun’e cuminda y carg’e. Abogado ta bisa cu muchanan ta esunnan cu ta zorg pa otro mucha. No tin cuminda, awa y limpiesa adecua pa e 250 mucha, baby y hoben na e stacion Border Patrol.
Un team legal a entrevista 60 mucha cerca di facilidad di detencion na El Paso, cu a bira e luga unda tin mas mucha migrante den negligencia y mal trato den man di gobierno Mericano. Tres mucha muhe a bisa abogado cu tin un mucha di 2 aña cu no tin pampers, y ta full muha.
Profesor di ley Warren Blindford, kende ta yuda entrevista e muchanan, a bisa cu e no por a siña nada di e mucha di 2 aña, e no sa di unda e ta bin of ken su famia ta. E no ta papia. “E muchanan aki ta cansa, nan ta drumi riba stoel of mesa di conferencia.”
Facilidad di gobierno tin demasiado hende. Cinco mucha imigrante a fayece desde aña pasa mientras tabata deteni pa Departamento di Aduana y Proteccion di Frontera. Un mucha muhe di Guatemala, 14 aña di edad, a bisa cu e ta wanta dos mucha muhe riba su scochi pa cuida nan. “Mi tambe mester nan cuida ami, mi ta mas grandi cu nan, pero mi tambe ta un mucha.”
E mucha ta bisa cu nan cuminda ta un cookie, bebida, papa mainta. Merdia nan ta haya noodles y pa anochi un burrito cu otro cookie. No tin fruta ni berdura. Nan tin dia sin baña of cambia paña.
“E instalacionnan aki no ta nada amigabel pa e muchanan, tampoco e sigur pa nan”, dr. Julie Linton a bisa, kende ta vice president di grupo di interes special di salud pa imigrante di academia Mericano di Pedatria.
