Como parti di e introduccion di ‘geen zittenblijvers’ den prome aña di scolnan basico di gobierno. Kleuterscol nan di gobierno lo bin cu un sistema cu muchanan cu no ta cla a bay eerste por keda kleuter a pesar di tin edad pa bay eerste. E intencion cu esaki ta pa manda muchanan prepara pa eerste, teniendo na cuenta cu tin hopi mucha cu ta ‘late bloomers’, segun Minister Michelle Hooyboer – Winklaar encarga cu enseñansa.
Con ta midi
E ta un hecho cu e mucha no ta bay capta tur tur cos den klas, mesun cos cu esun mas ‘sabi’ den e klas. Esey no ta e unico factor den enseñansa, cu ta midi si un mucha mester keda sinta si of no. Tin otro factornan y eynan ta bin atrobe e guia cu ta necesario pa por sigura cu e muchanan ta sigui stroom door cu nan ‘klasgenoten’.
Extra aña di kleuter y continuacion
“Otro factor cu ta hopi importante ta, cu e mucha mester ta cla pa cuminsa eerste klas. Esey tambe a implementa un maneho unda cu ta ofrece un extra aña di kleuter. Esaki ta muchanan cu ta yega na edad den kleuter cu ta duna nan derecho pa cuminsa eerste klas, pero si mayornan of scol ta wak cu e mucha no ta cla pa cuminsa scol formal, e lo beneficia di un aña extra na kleuter sin cu e mester haci testnan cu normal antes lo mester a haci como un di e rekisitonan. Kiermen a simplifica e proceso, cual ta bay yuda tambe cu esunnan cu ta stroom door pa eerste ta realmente cla academicamente y cu nan ta madura tambe.”
Esey ta e conclusion pa e prome parti, pero e plan lo sigui e ora tambe den tweede klas, Sra. Hooyboer – WInklaar a duna di conoce. Eynan tambe e muchanan ta bay ricibi guia si ta wak cu nan no ta captando of cu nan tin dificultad den cierto areanan. Pa esaki ta rekeri partnership hopi grandi cu tur e diferente actornan.
Extra ayudo muchanan cu ‘stroom door’
Pa locual cu ta extra ayudo brinda na muchanan cu no a keda sinta pero ta mas zwak, a puntra Minister Hooyboer – Winklaar con e sistema lo ta pa yuda nan cu extra les. El a splica cu tur cos lo tuma luga na scol mes, pues si un mucha cay atras cu Hulandes, na scol mes lo bin un maestra pa reenforsa e guia y sosten cu e mucha mester durante ora di scol. “Awo claro si cualkier mayor ta bisa e kier duna su yiu extra ayudo, esey por.”
Sra. Hooyboer – Winklaar a enfatisa cu den e prome dos klasnan di scol basico, e enfasis no mester ta asina tanto riba e stof, pero riba e bienestar emocional, y kico mas por wordo haci pa saca e maximo for di e muchanan. Tur ta factornan cu ta hopi necesario pa pone acerca.
“Con un mucha a haci riba un test di rekenen ta un parti di dje y hopi biaha ta pone mucho enfasis riba dje. Mescos cu AVI lezen, tin scolnan cu a cambie y hacie un manera pa duna cifra cual no tabata e intencion. E ta solamente un manera pa midi con un mucha ta desaroyando riba e parti di lesa cu tempo, pero no ta trata si e ta compronde. Esey ta cosnan cu kier coregi. Hopi mucha ta ‘late bloomers’ kiermen ta despues di eerste cu tweede, nan ta cuminsa capta mas cos.”
Terminando Sra. Hooyboer – Winklaar a bisa: Pa awo lo enfoca riba klas 1 cu 2, pero despues lo sigui. Pa increibel cu e por zona, tin paisnan cu no conoce keda sinta den scolnan basico. Semper lo tin un variacion den nivel di diferente muchanan, eynan ta unda cu tin maestronan cu ta domina e aspecto di diversificacion. Unda cu den e mesun klas e ta traha gruponan y ta duna diferente nivel di rekenen. Kiermen no ta categorisa a base di nivel, sino den e mesun klas por incorpora esaki. “Esakinan ta desaroyonan di enseñansa cual ta convenci cu lo tin un influencia sumamente grandi riba e trayectorio di enseñansa.”
Update: Aclaracion noticia ‘Mucha lo por keda sinta den kleuterklas’
Bon Dia a publica riba diaranson 10 di augustus den corant y riba Bon Dia24 e articulo ‘Mucha lo por keda sinta den kleur’ unda ta splica cu minister di Enseñansa Michelle Winklaar tin e intencion pa bin cu un sistema unda muchanan cu no ta cla pa bay eerste klas, pa keda den kleuterklas. A pesar cu e muchanan aki ya tin e edad pa bay eerste klas.
A base di e comentarionan di lesadonan, nos ta compronde cu esaki a crea confusion cu gobierno awor lo bay obliga muchanan pa keda sinta. Esaki ta un interpretacion eroneo y no ta substancia pa locual a skirbi den e articulo. Pa motibo di esey e cabes di e articulo ta bisa: Mucha lo por keda sinta. E cabes aki tampoco ta un citaat di minister. Den e caso cu ta trata di palabranan cu e mandatario mes ta uza, nos ta pone su palabranan entre comia.
E dia siguiente nos a publica un editorial cu lamentablemente ta contribui na e confusion aki pa motibo cu ta sugeri cu minister ta bay obliga mucha pa keda sinta. Esaki si nos ta lamenta como redaccion.
Un biaha mas: Minister Winklaar a indica den un entrevista cu muchanan lo por keda den kleuter (boluntariamente) si nan no ta cla ainda pa eerste klas. Teniendo na cuenta cu tin hopi mucha cu ta ‘late bloomers’. Asina kier evita cu ‘late bloomers’ aki lo keda sinta den eerste klas. Banda di duna e muchanan e opcion aki, e minister tambe kier bin cu un sistema di guia, esta ayudo extra pa e muchanan aki y asina mehora e chens pa nan por ‘stroom door’.
