(AP) – Un doño di cas di Illinois, Merca acusa di staca un mucha di 6 aña y seriamente herida su mama a ser acusa di crimen di odio despues cu polis y familiarnan a bisa cu el a scoge su victimanan a causa di nan religion y como respuesta na e guera entre Israel y Hamas.
Den dianan recien, polis na ciudadnan di Merca y autoridadnan federal tabata den alerta halto pa violencia causa pa sentimentonan Islamofobico of antisemitico. Oficialnan di FBI conhuntamente cu gruponan Hudiu y Musulman a reporta un aumento den sentimentonan di odio y menasa.
Den e caso di Chicago, oficialnan a haya e muhe di 32 ana y e mucha homber diasabra mainta na un cas segun Will County Sheriff Office. Familiarnan y un grupo cu ta boga pa libertadnan civil di Musulmannan a identifica e mucha cu a fayece como e muhe su yiu. A declara e mucha morto na hospital, mientras cu e muhe tabatin varios herida di stacamento y ta premira di sobrevivi esaki segun e declaracion. Un autopsia ehecuta riba e mucha a constata cu el a ser staca varios biaha. “Detectivenan por a determina cu ambos victima di e atake brutal a ser scogi pa e sospechoso pa motibo cu nan ta Musulman y e conflicto andando entre Hamas y e Israelitanan,” e departamento di polis a declara.
Joseph M. Czuba di 71 aña a ser acusa formalmente cu asesinato di prome grado, intento di asesinato y dos caso di crimen di odio y atake grave cu arma mortal. WLS-TV a reporta cu Czuba tabata den plan pa un audiencia inicial dialuna atardi na Joliet, segun Will County State su oficina di abogado.
Intentonan di yega na Czuba of un miembro di e famia no tabata exitoso.
Autoridadnan no a revela e nomber di e dos victimanan sinembargo e mucha homber su tio paterno, Yousef Hannon, a papia na un conferencia di prensa diadomingo unda e mucha homber su tata tabata presente. El a keda identifica como Wadea Al-Fayoume, un mucha homber Palestino-Americano cu recientemente a cumpli su di 6 aña. E organisacion a identifica e otro victima como e mucha homber su mama. “Nos no ta bestia, nos ta ser humano. Nos kier pa hende mira nos como ser humano y pa sinti nos como ser humano, trata nos como ser humano, pa motibo cu esey ta loke nos ta,” Hannon a expresa, un Mericano Palestino cu a emigra na Merca den aña 1999 pa traha como un docente di scol publico.
E organisacion a yama e crimen aki “nos pio mal soño” y parti di un aumento alarmante den yamadanan di odio y e-mail desde cu e guera a cuminsa. E grupo a cita mensahenan di texto intercambia entre famianan y miembronan cu a mustra cu e personanan mandando mensahe ta haci remarcanan inaceptabel contra Musulmannan.”
“Palestinonan basicamente, atrobe, cu nan curason kibra pa loke ta pasando cu nan hendenan awo tambe mester preocupa pa e siguridad di nan bida bibando aki den e pais cu e democracia mas liber na mundo,” Ahmed Rehab, director ehecutivo di e grupo a expresa.
