Mucha homber di 8 aña a fayece ora cu train a pasa riba dje na stacion principal di Frankfurt dialuna, despues cu un homber a pusha e cu su mama riba e railnan, asina Polis Aleman a bisa.
E homber a pusha e mama y despues e mucha riba e rails cora cu e train ICE di velocidad halto tabata yegando na e stacion, un di e stacionnan mas ocupa na Alemania. E mama a logra scapa, pero e train a dal y a pasa riba e mucha homber na unda cu el a sufri heridanan fatal. E sospechoso aparentemente a intenta sin exito di pusha otro persona riba e pista, Polis a bisa.
E sospechoso di 40 aña di edad a huy di e sitio na momento cu otro personanan, cu a mira su ultimo intento, a core su tras y a want’e mientras cu autoridad a yega arest’e. E tabata ser interoga y no tabatin informacion inmediato tocante e posibel motibo. E Vocero di Polis, Isabell Neumann a bisa cu ta parce no tin un conexion entre e sospechoso y e victimanan.
E mucha homber a ser hiba pa un hospital y tambe a ser interoga. No tabatin informacion inmediato tocante su heridanan. Polis a bisa cu e sospechoso ta ciudadano Eritreano, pero no a revela di inmediato mas informacion.
Minister di Interior, Horst Seehofer, a emiti un declaracion condenando e acto teribel den terminonan mas energico y advertiendo di saca conclusionnan antes di cu nan sa mas. Seehofer avisa cu, en bista di varios delitonan grave recientemente, e lo interumpi su vakantie y lo reuni cu e hefenan di autoridadnan di siguridad awe diamars.
E no avisa specificamente di kico e ta referi na dje, pero e incidente di dialuna ta sigui un caso na principio di e luna aki na unda un muhe di 34 aña di edad a ser pusha dilanti un trein y asesina na Voerde, na noord di Alemania. E sospechoso di e caso aki ta un Serbio cu a nace na Alemania y ta den custodia.
