Ayera despues di 5or di atardi na Mangel Halto a sucede un caso na unda un mucha di 9 aña a guli hopi awa y tabata rekeri asistencia cu urgencia. Polis di trafico a yega na e sitio y a yuda cu reanimacion di e mucha mientras ambulance a yega na e sitio.
Segun vocero di Cuerpo Policial di Aruba, Liliana Rasmijn, central di polis a ser notifica cu un mucha a encontra problema den awa na Mangel Halto y di biaha a manda unidadnan di polis na e sitio cu urgencia.
E prome unidad cu a yega na e sitio a encontra cu ya caba personanan cu tabata presente na e sitio tabata sacando e mucha for di awa. Polis a cuminsa duna asisntencia y a duna CPR mientras nan tabata en espera di ambulance.
Na su yegada ambulance a tuma over esfuersonan di CPR y a transporta e victima cu maximo urgencia pa hospital, ken tabata den un estado critico. Ta trata di un mucha homber local di 9 aña di edad.
Segun informacion e mucha tabata cu su mayornan y famia na lama y den un momento e mayornan a perde a mucha for di bista. Otro persona cu tabata presente na e sitio a wak e mucha y a yuda saca e mucha for di awa.
Lamentablemente na hospital no a logra reanima e mucha y pa 6:40 di atardi dokter a constata morto di e mucha homber di fam E naci 11 di maart 2015 di apenas 9 aña di edad.
Bon Dia Aruba ta manda palabra di profundo condolencia y forsa na famia di e fayecido.
