Dialuna merdia un caso fastioso ta sucede na altura di un kleuterschool cu nos no ta bay divulga e nomber.
E mucha homber chikito aki di 4 pa 5aña tabata sinta su so ariba su tas bou un mata. Esaki tabata den careda di 1:30, y siendo cu skol ta caba 12:30. Pues ya pa basta rato e criatura inocente aki ta sinta su so banda di caminda grandi y hopi trafica ta warda su mayornan.
Dos dama cu a pasa eybanda y a wak e situacion a papia cu e mucha y despues a cana bay direccion di e kleuterschool, mirando cu ainda tabata tin maestra eynan.
Pa sorpresa ta bin tende cu si nan ta na altura di e mucha homber aki su caso, y cu aparentemente nan a comunica y informa e instancia nan concerni. Pero nada no a cambia.
Aparentemente e mucha homber aki berdad ora skol caba un persona adulto ta buske, pero segun nos a compronde e persona aki ta buske pero ta lage su so sinta warda banda di e muraya di e skol poco mas panort, te ora e mayornan bin buske.
Dialuna ya tabata birando 1:30, y ainda criatura inocente aki tabata sinta ariba un tas su so ta warda, pues por bisa casi 1 ora ta warda loke no por.
Mescos cu e dos dama nan aki cu ta hende cu di bon curason a tene su man y ambos a cana bay cune paden di e skol mescos un persona cu mal intencion tambe por a papia kiko cu ta cune y tene su man y desaparece cune.
Ban cuida nos criatura nan, nan ta inocente. Nos no ta na altura kiko por ta e motibo cu e mayornan no ta busca e criatura aki na ora, pero nos ta spera cu nan por resolve e caso aki mas lihe cu ta posibel prome cu algo no bon pasa, loke mas cu claro nos no ta desea.
