Ayera mainta a circula un publicacion riba Facebook relaciona cu un mucha cu a keda maltrata/tortura aparentemente por medio di su mayornan. E mucha a wordo hiba hospital diaranson pasa cu heridanan hopi serio segun Ministerio Publico. Ayera tardi el a fayece na hospital.
E mucha di incial R.A., 5, a fayece ayera tardi na hospital y su mama cu padrastro a keda deteni. Segun e tanta di e criatura cu a post riba Facebook diabierna mainta pidiendo oracion pa su sobrino: e mucha aparentemente a wordo maltrata cu resultado di weso di pols kibra, weso di schouder kibra, 2 ribs un di cada banda kibra, algun di e fracturanan aki tabata bieu, el a ser kima cu awa cayente, sufri di hersen bloeding di tanto cu el a wordo bati na su cabes y tambe a test positivo pa Marijuana indicando cu tabata tin hopi humamento rond di e mucha. Segun e señora cu a publica esaki online, e mama a gaña polis cu e mucha a cay den un speeltuin siendo cu no ta berdad y dokter a saca test mustrando realmente kico a pasa cu ne.
Maltrato
“Tur loke a wordo menciona cu ta fractura bieu nunca nan a hib’e hospital pa trata nada,” e dama a indica. El a sigui bisa cu su sobrino a wordo tortura por medio di su mama of padrastro, of nan dos y ta pidi husticia pa esaki. E mucha tabata asina grave cu e no por a hala rosea riba su mes pues a but’e riba maschin respiratorio segun e tanta. A pidi oracion mas trempan pa e mucha stabilisa pero lamentablemente el a fayece mas atardi. Nos a acudi cerca Ministerio Publico y ta pendiente pa algun informacion tocante e caso y detencionnan cu a wordo haci.
Segun Ministerio Publico, fiscal di husticia a laga confisca e curpa y autopsia lo tuma luga dentro di poco. E mucha a wordo hiba hospital diaranson cu heridanan hopi grave segun Ministerio Publico. E tanta tambe a publica ayera nochi cu ainda no por a localisa un otro sobrino, bisando cu: ‘e no ta aparese y nan no kier bisa unda e ta of kico nan a haci cu ne.’ Ministerio Publico tampoco tabata tin informacion riba esaki anto nos no a haya ningun update di polis. Ta trata aparentemente di un mucha di tres aña di edad cu famia tin mas o menos dos luna sin wak e, segun e tanta a expresa riba social media. Nos a purba tuma contacto cu e señora pero no a logra te ainda.
