Bolivia ta bibando dianan di conmocion y drama pa un mucha muhe di 12 aña cu a muri a causa di desnutricion cronico. Famia di e mucha muhe ta den constante drama pasobra nan ta biba den pobresa extremo na ciudad di El Alto, ciudad bisiña di La Paz.
Diasabra a sali na luz publico e historia di e mucha muhe cu a ser dera, despues cu el a muri diabierna. E caso a hala atencion di algun autoridad, medio di comunicacion, iglesia catolico y comunidad cu ta lamenta e tragedia ey. Gobierno a priminti di construi un cas pa e famia ey y asina duna trabao na e ruman grandi di e mucha cu a muri, asina Virginia Velasco, director di gestion social di ministerio di presidencia, a splica.
E mucha muhe a muri a causa di pobresa den cual su famia ta biba”, e frase ey tabata skirbi riba un borchi cu tabata riba e porta di e bisiña, unda e curpa sin bida di e mucha tabata, conoci como Eva. Eva tabata biba den un camber cu un dimension di cuatro pa cuatro metro, hunto cu su tata Eliseo y su mama Lourdes y cinco ruman mas, di entre 3 y 18 aña, den condicion di pobresa extremo, medio local a informa. Famia di Eva tabata biba pa ultimo 14 aña y te november di 2016 den un cas cu Eliseo y Lourdes tabata cuida, pero nan a keda sin cas, ora cu propietario di e cas ey a bende e propiedad. E doño nobo di e cas, unda Eva y su famia tabata biba, a dicidi di tumba e cas y pa asina por construi un cas nobo.
Despues di e situacion ey, famia di Eva a bay biba den un camber, pero na momento cu Eliseo y Lourdes a ripara cu no tabatin trabao mas, anto nan a bay den un profundo depresion y no a sali di nan cas mas. E yiunan di e pareha ey no a bay pa scol mas tampoco pasobra nan no tabatin placa. Alan, ruman di Eva di 18 aña, tabata purba di haya un solucion pa mantene su famia. Alan ta sinti hopi duele cu tur su esfuerso no tabata suficiente pa salba e bida di su ruman Eva. Eva tabata sufri di epilepsia tambe. Segun palabra di Alan, su ruman muhe Eva no a come pa 1 siman, na mesun momento cu e atakenan di epilepsia a aumenta te 8 convulsion pa dia.
