Polis di Tibu, situa na departamento Norte de Santander – Colombia a haya banda di 8 or di anochi un mucha di 12 aña cu a yega te stacion di polis, hopi cansa, agita y spanta, mientras el a pidi proteccion di autoridadnan eynan. El tabatin hamber y sed. E mucha a ser atendi pa oficial di polis.
“Kico a pasa bo?” Polis a puntra e mucha. E mucha menor a bisa cu e tabata huy for di ehercito di Liberacion Nacional (ELN). El a splica cu gueriya a yega te su cas y nan tabatin intencion di hib’e cu nan, via uso di forsa. Corant El Colombiano a publica cu dos homber cu tabata bisti paña civil y cu arma di candela cortico a pidi e mayornan di e mucha, pa laga e menor drenta den gueriya na Colombia. E homber a bisa e mayornan di e mucha, cu e plaso di tempo, pa duna e mucha na gueriya, a vence caba.
E menor a scucha e conversacion entre su progenitornan y grupo di gueriya y el a dicidi di huy for di su cas. El a bay sin bisa nada na su mayornan.
“Na momento cu el a yega na e warda di polis, funcionarionan a yama di inmediato funcionarionan di instituto Colombiano di bienestar familiar, cu obhetivo di garantisa tur derecho di e mucha menor. Polis a laga e mucha den cuido di instituto di bienestar, cu lo brinda acompañamento di banda di un ekipo profesional den psicologia, pa asina duna atencion na e caso aki, ”, polis a publica den un comunicado.
Gobierno di Colombia y Ehercito di Liberacion Nacional ta den un proceso di dialogo, desde dia 7 di februari di e aña aki na Quito, Ecuador, cu obhetivo di finalisa cu e lucha cu nan tin desde mas di 52 aña.
