Prome Minister, Evelyn Wever-Croes den weekend a informa cu tin 46 caso positivo di Covid-19 di un total di 559 test cu a wordo haci te aworaki. Nan ta den bon estado di salud. Finalisando su conferencia di prensa di diasabra anochi, el a laga sa cu un di nan ta un mucha di apenas 11 aña.
E ta un señal cu ‘e virus aki no ta discrimina’, el a bisa. E mucha aki ta e edad mas hoben di pashentnan cu Covid-19 na Aruba. Mayoria di esnan cu tin e virus confirma den nos pais, ta entre 25 y 34 aña, pues un edad jong. Mas cu un 10% ta den un edad vulnerabel, nan ta hende grandi.
E prome mandatario a pidi un biaha mas y categoricamente pa tur hende keda cas, y solamente sali pa loke ta strictamente necesario. E ta e unico forma pa bo keda safe y bo famia tambe.
