(Retkaribense)Ya pa añanan largo mayornan ta keha tocante e falta di bon enseñansa den e munisipionan Caribense pa mucha cu por ehempel autismo. Un entrevista cu minister Wiersma (Enseñansa primario y secundario) tocante enseñansa special den e munisipionan Caribense a trece bululu.

Minister Wiersma ta haya cu sigur tin ‘un bon red di expertisa’ na e isla. E problema segun e minister hopi biaha ta cerca e mayornan mes, cu ta haya cu ta “fèrfelu” pa acepta yudansa’ pa nan yiu. E ponencianan ta conduci na asombro bou di mayornan y personal di enseñansa.

Den practica pa haya yudansa ta resulta di ta dificil y caro, nan ta bisa. “Mi a rabia masha ora mi a lesa su reaccion”, Vanessa Tunk ta conta. For di 2016 el a cuminsa busca yudansa pa su yiu muhe cu autismo. Aña ‘den, aña ‘fó nos a pasa na tur dunado di yudansa. Pero na e scol regular nada no a cambia.

‘francamente bisa, mi no sa berdaderamente di kico ta trata’
Minister Dennis Wiersma djis prome cu e entrevista cu Ret Karibense kier a sa prome tocante kico e preguntanan tabata. Despues prome e kier a delibera lihe lihe cu un ambtenaar cumbre, prome cu e lo a reacciona dilanti camara. “Pasobra francamente bisa mi no sa berdaderamente di kico ta trata.”

Marie Craane ta logopedista pa entre otro mucha cu autismo y nan mayornan. E mes tambe tin un yiu cu autismo. E ta asombra cu e minister ta bisa cu mayornan den Caribe mes hopi biaha no ta acepta yudansa. “Pasobra esaki no ta mi experencia.”

“Kisas mayornan no por formula nan peticion di yudansa facil of cla tur ora, pasobra nan no sa kico e posibilidad nan ta. Pero den esey nan mester di guia y yudansa di hende profesional.”

‘E muchanan hasta ta bira drop-out’
Un otro mayor* no kier reacciona cu su nomber, pasobra Boneiro ta un isla chikito. “Den practica mi a mira hopi mucha cu tabatin mester di atencion special, pero cu no tabata haya esaki. Tabata manda e muchanan aki, mi mes yiu tambe, di un punta pa otro!”

“E muchanan tabata bay over sin cu nan tabata domina e materia di les, pasobra e organisacionnan di yudansa no tabata yuda nan intensivamente. Pa e motibo aki den enseñansa secundario hasta nan a bira drop-out.”

“Mi mes – cu tur loke cu mi tabata por – a duna mi yiu e yudansa necesario, pa e por a bay e klas di examen tog.”

‘Bo ta tende mayornan roga pa yudansa den acogida despues di scol’
No ta un problema di ultimo añanan, pero awor tambe, un mayor cu ke reacciona anonimamente* ta bisa. “Mi yiu cu ta super inteligente tampoco no ta haya e atencion necesario na scol basico. Esey ta pasobra den e klas ey tin mas o menos dies mucha cu mester di atencion special. E docente ta lucha cu di mas presion.”

“Despues mi ta mira na e reunion di acogida despues di scol cu otro mayor ta casi roga e empleadonan pa yuda nan yiu cu tin autismo cu guia den nan tareanan di studia na cas. Na scol esaki no ta logra pasobra ta falta experticio.

Actualmente ta mayor cu placa so por paga scol priva’

E conocemento y experticio ey pa enseñansa special si tey na e scol priva Het Koraal. Aunke inspeccion di enseñansa a aproba e scol aki, no ta subsidia e scol.

“Ta increibel cu un mucha cu autismo na Boneiro solamente tin acceso na enseñansa adecua si e mayornan tin un entrada mas cu moda”, segun mayor y logopedista Marie Craane. “Na Hulanda Europeo e mayornan por scoge pa enseñansa special. Pakico esaki ta diferente pa e munisipionan Caribense?”