Un mucha di 11 aña cu a ricibi menasa di morto despues di reclama un miho acceso pa educacion durante pandemia covid-19 a wordo reconoci pa ONU pa su activismo.
Francisco Vera ta conoci na su pais Colombia pa su campañanan medio-ambiental y su defensa di derechonan di mucha.
15 di januari a ricibi un menasa di morto desde un cuenta anonimo di Twitter despues di publica un video den cual a señala pa gobierno e mehora di e conexion di internet di muchanan cu ta siña online.
Awor, ONU a entrega den man di Francisco, un carta dunando un pabien pa su trabou na e pais sur Americano, na unda no ta comun cu activistanan medio-ambiental ta wordo asesina.
Den un entrevista, e studiante ta bisa cu e ta gradici e criticanan, pero cu menasanan violento no ta aceptabel.
E incidente a lanta indignacion na Colombia, na unda violencia contra activistanan di derechonan humano y lidernan medio-mabiental ta sigui aumenta.
Tambe a haci impulso di yama pa un mayor civismo riba rednan social.
“E tipo di menasa asina ta comun na Colombia y tambe nan ta keda impune” Lourdes Castro, di Somos Defensores, un grupo cu ta documenta agresionnan contra lidernan comunitario a bisa.
Den un carta firma pa Michelle Bachelet, Halto Comisionado di ONU pa Derechonan Humano, e organisacion ta gradici Francisco pa su activismo y ta proclama cu e mundo mester di mas hoben cu su “pasion pa protege e planeta”.
Francisco a funda un grupo ecologista na 2019 cu ta yama Guardianes de la Vida, na su ciudad natal, Villeta, 90 kilometer di e capital Bogota.
E mama di Francisco, Ana Maria Manzanares, ta spera cu e reciente menasa contra su yiu riba Twitter no ta mas cu un cruel joke.
E ta conta cu funcionarionan di gobierno a yam’e pa ofrece nan apoyo y cu nan ta investiga ken por ta e persona cu ta tras di e mensahe.
