Bon Dia Aruba a tene un entrevista cu Mitchell Tromp (MTCHLL) e cual ta duna di conoce un tiki di su historia, con el a cuminsa como cantante y kico a motiv’e pa canta e cantica ‘Tanten mi tin Rosea’ e cual ta transmiti positivismo y cu a wordo dedica pa su tata fayecido.

Tromp ta un hoben cu a cuminsa canta den show di talento di scol basico, for di eynan el a participa den varios obranan teatral hunto cu Grupo Teatral Kibrahacha. Na 2008 cu 14 aña di edad el a skirbi pa Sparkling Tour y a termina na di 4 luga.

Despues di esaki, el a participa y gana den varios festival di canto cultural y tambe el a lansa varios cancionnan di Pasco, carnaval y Himno y Bandera te cu aña 2012. Cu 18 aña di edad el a bay biba na Hulanda y a studia musica na Herman Brood Academie e cual a termina na 2016.

Den su añanan na Hulanda el a canta den 3 diferente banda musical y a haci un tour den Europa, participando den diferente festivalnan. Por ehempel, Kuaku na Amsterdam y Afro Latino Festival na Antwerpen unda tabata tin e oportunidad pa comparti e mesun escenario cu Daddy Yankee.

Mas recien el a cuminsa traha ariba musica original cu Karixon, un productor Arubano cu e ta admira masha hopi mes. Hunto cu John Francis nan a crea un cover di Dream Girl originalmente canta pa Ir Sais y Rauw Alejandro e cual a keda dos siman na number 1 den e top 40 di Aruba.

Tromp a expresa cu un di motibo pa e cual el a cuminsa canta ta pasobra esey tabata un di su dos deseonan den kico e lo kier a bira den futuro. Su prome opcion tabata piloto pero asina cu el a descubri cu e por ‘touch hende’ cu su bos di biaha canto a subi na prome luga y ainda e ta na prome luga, segun el a afirma.

Igualmente, manera ya ta conoci caba, dia 9 di juni 2020 su tata Mickel S. Tromp a fayece na e edad jong di 50 aña, di esaki, el a sigura cu den un conversacion cu su wela, e tabata contel’e con dos dia prome cu su tata a fayece e tabata baila y canta rond di cas den bos halto hunto cu Grupo di Betico den nan concierto en bibo na television.

For di eynan un idea a drenta den su cabes pa haci un homenahe pa su tata cu un participacion hunto cu Grupo di Betico, el a tuma contacto cu Jaderick Croes ken a compone ‘Tanten Mi Tin Rosea’ y el a ponel’e den contacto cu Gos Oduber cu ta un miembro di Grupo di Betico.

Di e manera ey, nan a cuminsa cana e caminda y a bin den contacto cu Miguel Genser cu a produci e cancion, “mi ta hopi agradecido cu tur porta tabata habri di biaha pa cu e colaboracion aki y mas cu claro, hopi satisfecho cu e resultado final”. Tur cos a pasa asina lihe segun Tromp a bisa, den 1 siman y mei casi 2, e cantica tabata cla y e video clip a wordo graba door di Dani Cruz.

‘Tanten mi tin rosea’ ta un di canticanan cu a haya hopi reaccion riba plataforma di rednan social, Tromp a menciona cu asina cu e video clip a premier online e reaccionnan a cuminsa drenta na monton, “pa bisa bo e berdad ami mes no a lesa ni tende di un reaccion negativo” cual ta algo hopi heartwarming p’e.

Asina mes, Tromp a señala cu el a wordo acerca cu storianan di personanan sufriendo di kebrante di salud cu ta sinti speransa pa via di e cantica, personanan cu a perde un ser keri cu ta haya forsa den e palabranan asina, “tur esakinan ta haci mi increiblemente agradecido y ta convence mi cu e mision a wordo cumpli”, el a relata.

Manera a wordo menciona prome, awor ta trahando cu Karixon y nan tin varios cantica “ready to go” asina cu e personanan por sigui spera hopi mas di MTCHLL den un futuro cercano.

Pa finalisa e entrevista el a laga un mensahe di gradicimento na un y tur cu ta apoy’e den su proyectonan, manera e cantica ta bisa, “ban disfruta bida, hiba alegria y semper cu un sonrisa”. Keda positivo hasta si nada no ta bay bon pa na final di dia nos tur por bisa nos a biba un bon biba.