(AP) — Jimmy Donaldson, mihor conoci online como MrBeast, ainda no a haci oferta pa obtene TikTok segun un representante di e strea di YouTube.
Donaldson a lanta interes den un post ariba 13 di Januari na X, caminda e la bisa cu e lo “cumpra TikTok pa nan no ban e”. E siguiente dia, Donaldson a añadi: “Hopi multimiyonario a contacta mi despues cu mi a tweet esaki, laga nos wak si nos por logra esaki.”
Esaki a parce mas sigur durante e siman cu a pasa ora Donaldson a ser nombra den rapportnan relaciona cu un grupo di inversionista cu ta busca pa cumpra e operacion Mericano di TikTok, dirigi pa e fundador y CEO di Recruiter.com Ventures, Jesse Tinsley. Un post di Tinsley na X ariba dialuna y un anuncio diamars cu a bin di e abogado Paul Hastings LLP, cu ta conseha e grupo, tur dos a identifica MrBeast como un parti di e esfuerzo aki.
Pero, contrario na esnan cu a raporta diamars anochi, e vocero di MrBeast, Matthew Hiltzik, a bisa cu Donaldson no ta oficialmente parti di ningun oferta of esfuerzo.
“Hopi cumprado ta den discusion continua cu Jimmy,” Hiltzik a bisa na Associated Press diaranson. “Pero e no tin ningun acuerdo exclusivo cu ningun di nan.”
Un representante di Tinsley a rechasa di comenta ora a pidi pa mas detaye diamars. Tampoco no a duna contesta ariba diaranson tocante dicon Tinsley a nombra Donaldson como un participante.
E futuro di TikTok na Merca ta keda insigur. Bou di un ley federal sosteni pa Corte Supremo siman pasa, TikTok tabata mester di a haya un cumprador aproba pa su operacionnan na Merca pa 19 di Januari, of enfrenta un prohibicion nacional. E plataforma no tabata disponible pa usuario Mericano diasabra atardi, oranan prome cu e deadline, pero e la bin back online ariba diadomingo cu un mensahe dunando credito na Presidente Donald Trump, cu a priminti pa para e ban.
Trump a bisa cu e tin un ‘luga special’ den su curason pa TikTok, cu e ta credita pa a yuda cu gana voto di hende hoben durante su eleccion presidencial aña pasa. Durante su prome termino como Presidente, e la trata di ban e plataforma, yamando e un menasa di seguridad nacional pa motibo di su conexion cu China.
Prome di tuma oficina dialuna, Trump a dirigi e Departamento di Husticia pa pausa e ban di TikTok te den cuminsamento di April. E tambe a bisa cu e ta considera pa laga gobernacion Mericano forma un deal pa logra 50% control di TikTok, agregando cu “tur hende rico” ta yamando e pa cumpra e plataforma di red social.
Diamars, Trump a agrega cu e ta habri pa un compra di TikTok cu presidente di Oracle, Larry Ellison, y Elon Musk, un titan den tecnologia cu a contribui mas o menos $200 miyon na un grupo di accion politico pa sostene Trump. Sinembargo, Ellison y Musk no a indica interes pa cumpra TikTok.
Varios otro iinversionista, manera multimiyonario Frank McCourt y ex-secretario Steven Mnuchin, tambe a expresa interes publico den cumpra TikTok.
Den entrevista di prensa e siman aki, Bill Ford, presidente di e compania global di inversion General Atlantic y un miembro di e hunta di ByteDance, a bisa cu e compania ta prepara pa interactua cu e administracion di Trump y oficialnan Chines pa haya un solucion cu lo mantene TikTok disponible.
