Ayera mainta na Parlamento di Aruba a ser huramenta e persona cu ta bay keda encarga cu e funcion nobo di Ombudsman, tambe yama Defensor di Pueblo, cual ta bay ta un instancia independiente y imparcial cu lo atende cu kehonan riba funcionamento di casi tur organisacion, departamento y/of fundacion gubernamental y estatal.

Presidente di Parlamento, Raymond Kamperveen a cuminsa cu e huramentacion indicando cu conforme cu articulo 5 di ordenansa di Ombudsman, Parlamento di Aruba ta e organo cu ta nombra e Defensor di Pueblo pa Aruba.

Den un reunion publico di dia 8 di juli 2024, Parlamento di Aruba a dicidi di nombra Mr. Jurima A.R. Bryson pa asumi e puesto menciona di Defensor di Pueblo di Aruba, esta Ombudsman, conforme esaki e ta ser huramenta na parlamento prome cu e lo asumi su funcion.

Despues di su huramentacion, cada parlamentario lider di fraccion di partidonan a duna nan palabranan di pabien na Bryson y tambe a enfoca riba e funcion importante aki den cual Bryson ayera mes a cuminsa eherce.

Despues di esaki, prensa a haya e oportunidad di entrevista Bryson caminda el a sigura cu e palabranan di pabien no ta solamente dirigi riba su persona, sino tambe na e pueblo di Aruba cu despues di tanto aña a logra pa esaki por bira un realidad.

“E ta un pabien pa Aruba, cu e instituto di Ombudsman a bin, a ser estableci y a ser nombra, pero awor e trabounan ta bay cuminsa, awor nos ta bay haci e tarea cu nos mester haci pa institui e behoorlijkheidsnormen, e reglanan pa nombra Kinderombudsman, pa tuma personal, pa haci tur cos posibel pa e instituto por cuminsa cana,” el a sigura.

Esaki ta e tareanan cu nan tin na corto plaso unda ainda no por duna un fecha exacto riba ki dia e instituto lo bay habri su portanan pa publico “pero mi ta compromete mi mes si pa traha incansablemente pa esaki ta e termino cu nos ta bay den start up, pa ta mas cortico posibel, pero e no ta tur cos ta depende di mi so. Tin un trayectoria pa cana, cosnan pa regla, prome cu e instituto aki por habri su porta, esey ta nifica cu nos tin cu haci tur e pasonan corecto pa nos por yega eynan.”

Pa por nombra un Kinderombudsman, Bryson a sigura cu e ley ta prescribi cu nan ta haci un nominacion y e ora ey Parlamento di Aruba lo bay nombr’e igualmente a sucede cu Bryson.

Igualmente, el a informa cu e instituto di Ombudsman ainda no por cuminsa tuma keho y e motibo di esey ta debi cu esaki no ta trata di un continuacion di un instituto cu tabata existi. Esey ta nifica cu nan ta cuminsando for di cero “naturalmente nos tin e sosten di Ombudsman den Reino Hulandes cu ya caba a duna di conoce cu nan lo bay sostene nos y duna nos tur e conseho y informacion cu nan a bin ta acumula den transcurso di tempo pa cu tur nan experiencia cu tin, nos ta paisnan den Reino pero nos tin nos mesun problemanan, hechonan, cosnan cu nos mester resolbe. Esey ta nifica cu mi no kier bisa un tempo specifico y mi no ta premira cu esaki ta bay keda cla prome cu aña aki lo caba.”

Sinembargo, el a sigura si cu nan ta bay hinca nan tempo, esfuerso y empeño pa cuminsa lo mas pronto posibel.

El a duna como mensahe “Pueblo di Aruba mi kier felicita boso cu e momento historico aki, e ta marca un trayectoria di hopi aña, diferente hende a traha pa e instituto aki por bin y mi kier a tuma e espacio pa duna un danki grandi na Sra. Sahaira Kelly cual ta fungi como kwartiermaker pa e instituto Ombudsman. Sahaira ta un di e personanan clave cu a haci e instituto aki posibel awe.”

Pa finalisa, el a declara cu “mi ta honra cu mi por ta e prome Ombudsman di Aruba y cu mi ta compromete mi mes pa traha cu honor y integridad pa lo cual e institucion aki ta para pe.”