Redaccion di Bon Dia Aruba a acerca vice-presidente di Conseho Electoral, mr. ing. Hubert Maduro, pa su opinion encuanto e problemanan cu ta surgi awor den cierto partido, unda aparentemente tin acuerdo por escrito, cu den caso cu candidato mas abao riba lista haya mas voto den eleccion cu un o mas persona mas halto riba lista, ta duna prioridad na esun cu mas voto.

BDA: E convenio aki, cu ta firma dentro di e partido, ta un convenio civil, pero kico ta e status legal, en comparacion cu ley di Eleccion (Kiesverordening)?

HM: Algun tempo pasa a surgi e idea di cambia ley, despues cu di diferente banda a cuminza keha cu e ley manera e ta formula actualmente, no lo ta husto, den e sentido cu por tin caso cu un persona cu considerablemente menos voto ta haya asiento, prome cu un persona cu mas voto, pero mas abao riba e lista. Pa cierto motibo e asunto ey, pa cambia ley, no a tuma lugar, asina ta e ley ta manera e tabata. Pa ta bon cla, e filosofia tras di e actual ley ta cu e ta faborece maneho di e partido, mediante nan elaboracion di nan lista. E ta duna e liderazgo di partido e oportunidad di pone hende cu talvez no lo haya tanto voto, pero cu ta considera clave pa tin un persona asina, cu tal conocimento o experiencia, den parlamento. Esey no tin nada di haci cu menosprecio pa esnan cu haya mas voto, ta pesey tin e regla di bay parlamento cu voto preferencial, ora e candidato logra esaki. E ora ey e ta pasa dilanti esnan cu ta bay parlamento segun e secuencia di e lista.

BDA: Si, pero awor nos ta haya e situacion cu e partidonan ta traha convenio entre nan cu den tur caso esnan cu mas voto ta haya preferencia. Con esey ta bay funciona?

HM: “Esey ta bay funciona tanten cu tur hende cumpli cu e acuerdo, cu no ta nada mas cu un convenio civil, cu no tin base den ley di Eleccion. Es decir, si tur hende cumpli cu e convenio, tur esnan mas halto riba lista cu menos voto ta renuncia nan posibilidad pa bay parlamento, y asina ta yega na e candidato cu e partido kier na e puesto. Den pasado caba cierto partidonan a haci uso di esaki, pero no a dun’e tanto atencion publico. Pero si un nenga di coopera, te eynan a yega anto, pasobra esey ta bay ta e persona cu ta huramenta, pasobra esey ta ley. Naturalmente esey por ta fin di e carera di e persona den e partido, pero esey ta asunto entre nan. Pero riba su mes e acuerdo dentro di e partido no por ta ‘bindend’ (obligatorio) den sentido huridico. Den pasado, na aña 1971, Hoge Raad a dicidi den e arrest conoci como arrest Verkiezingsafspraak Elsloo, cu huez civil no ta autorisa pa atende un caso unda ta trata di un acuerdo dentro di un partido encuanto eleccion. Esey ta significa cu e tipo di acuerdonan ey no ta huridicamente ‘bindend’.”

BDA: Den e caso particular di e conflicto den partido Accion 21, unda e number 2 ta bandona e partido, den caso cu mester bay abao den e lista pa haya un parlamentario nobo, e persona ey lo ta e siguiente candidato?

HM: “Corecto. E hecho cu e no ta pertenece mas na e partido no ta significa nada; e ta keto bay riba e lista di candidato, cu no ta cambia den e añanan cu e ta vigente. Pues si e partido mester bay busca un siguiente parlamentario pasobra e lider, cu asiento unico, no ta bay parlamento, e persona cu a sali o a keda expulsa di e partido, ta e ‘next in line’ pa bisa si e ta desea di tuma e asiento. Tur esaki ta basa riba ley, y no tin nada di haci cu loke a palabra dentro di e partido.”

BDA: Pakico nos ta termina den e tipo di situacion aki, unda ta culpa e ley di ta anticua?

HM: “ Mi tin e impresion cu tin ora tin hende cu no ta comprende pakico e ley ta. E ta duna, entre otro, e partidonan un instrumento pa organisa nan management, por ehemplo, busca un balans entre hende cu ta hala voto y persona cu otro cualidad cu e partido lo ta desea di tin den su fraccion. Eleccion pa parlamento no ta un certamen di beyeza, unda esunnan mas popular so ta haya puesto. E ta un manera pa yuda organisa administracion di un partido, pero na su turno e partido cu un bon mix di cualidad den parlamento ta beneficia e pais.”