Diahuebs mainta, parlamentario, candidato y miembro di Partido di Pueblo Arubano (AVP) a duna su prome declaracion na prensa despues di tur desaroyo cu tabatin den e ultimo simannan. Den su manera caracteristico skerpi, e politico a trece dilanti su reaccion na e loke a sucede durante ultimo tres siman y te cu dia di ayera.

Croes tambe a haci un peticion na prensa pa dun’e tempo di por sinta den su seno y yega na un decision pa cu su carera politico y specificamente su afiliacion na partido AVP.

A cuminsa na indica cu loke tabatin dialuna ultimo na Cas di Partido na Playa tabata un ‘partijbieenkomst’ y no un ‘partijraad’, cual el a atende y a sali di dje masha desapunto y desilusiona. Entre otro, pa motibo cu e mesun dia a sostene un reunion entre mayoria miembro di fraccion di cual e no tabata informa. Croes ta considera esaki un falta di respet grandi, ya cu e ta esun cu durante ultimo dos aña ta fungi como lider di fraccion. “Pa mi e ta inaceptabel con bo por funciona den un fraccion caminda abo ta bin ta carga ta lucha y vocifera pa e partido, pero bo no ta wordo bisa cu tin reunionnan ta tuma luga den oficina cera,” el a declara.

Posteriormente, Croes a haya yamada di lider di partido, mr. Mike Eman, pa sinta na mesa cu ne. Basa riba loke a papia durante e encuentro bek, e politico ta pidi comunidad y prensa tempo pa asina e bay bek den su seno. Esaki, segun Croes ta e grupo cu for di seis aña pasa cu el a drenta politica, nunca a lag’e na caya, pa cual el a gradici nan tambe pa esey pa e sosten incondicional di e ultimo simannan. E ta compronde e ansha di prensa y deseo di pueblo pa sa unda Gerlien Croes ta para, pero ta necesario pa sinti cu su famia y sostenedo pa mira si tin mester di tuma un decision of no. Por lo pronto, el a ratifica cu e ta ainda miembro di partido y di e fraccion AVP.

Croes: “Den bida nos por tin diferencia di opinion y hopi biaha cada banda tin emocion atacha, pero esey no ta descarta cu nos ta politico, cu nos ta hende grandi cu mester tin respet pa otro. Esey ta caminda mi ta sinti hopi desapunta cu un falta di respet grandi tabatin na mi persona.” Mas aleu a indica cu “decision mester wordo tuma racional y no a base di emocion. P’esey atrobe mi ta bisa cu tabatin combersacion ayera y mi mester bay bek na mi seno pa mi duna un claridad riba e re evaluacion di mi posicion.” Mientrastanto, Croes ta sinti cu e no por duna opinion, ni tampoco cuestiona e decision cu su colega di fraccion a tuma diamars ultimo, indicando si cu e ta kere cu hustificacion di esaki ta varia den opinion publico.

Mas aleu, e ta sigui presenta na trabou como miembro di e fraccion berde ya cu e ta cumpli cu e responsabilidad cu pueblo a dun’e y ta pag’e pa e haci. E ta kere cu asunto interno di partido no mester interferi di presenta na pia di trabou.

Pa loke ta trata e sentencia di colega parlamentario Benny Sevinger, Croes a duna di conoce cu como colega y ser humano, e ta contento cu e decision a sali mas na Sevinger su fabor, pero na mesun momento tin aspecto den e sentencia di Hues cu no por descarta pa e futuro di politica na Aruba. Mescos cu e ta celebra e derecho di lucha pa husticia y di apela, mester reconoce cu tin un desconfiansa inmenso den e imagen di tur organisacion politico. Esey ta hustamente e motibo pakico el a drenta politico na 2017, den nomber di un generacion cu ta pensa diferente y ta anhela pa cosnan bay diferente.

“Politica tambe kier men cu tin biaha bo tin cu haci compromiso, bo tin cu yega na otro; bo no por descarta otro su opinion pasobra kisas nan ta mas hoben, nan ta pensa otro, nan ta critico of nan tin opinionnan propio. Bo no por descarta esaki na momento cu bo ta sinta na mesa papia over topico cu ta sumamente importante pa e organisacion, pero na final di dia, pa e pueblo di Aruba,” asina Croes a expresa.

E ta convenci cu decision manera esun cu e tin su dilanti awo no por wordo tuma a base di ken a convence otro, pasobra nan tin impacto, no solamente riba su persona, pero pueblo, comunidad y un generacion eyfo cu pa hopi aña ta pidi pa tin un bos den politica na Aruba; un generacion cu ta pidi pa cambio, pa trece obhetivo diferente.

“Mi ta kere pueblo completo merece tin un bos diferente, merece di tin un politica eleva, di contenido y esey ta locual mi ta para p’e. Mi no ta bay laga mi sostenedonan cay, mi no ta bay laga pueblo keda cu un bashi di un persona cu tin Aruba asina na pecho y haciendo e maximo esfuerso pa trece e cambio den politico; en todo caso pa cuminsa e forma cu nos ta hiba politica na Aruba,” asina e politico a declara diahuebs mainta na prensa.