Recapitulando loke tabata diamars como prome dia di Interparlamentaire Koninkrijksoverleg (IPKO), delegado di Aruba y parlamentario di Partido di Pueblo Arubano (AVP), mr. Gerlien Croes ta pronostica cu lo tin un par di dia interesante nan dilanti caminda un di e topiconan cu lo resalta sigur ta esun di sclavitud y colonialismo.

Di otro banda, a papia tambe caba riba e fluho di inmigracion ilegal y con esaki ta afecta e paisnan den reino. Croes a señala cu entre Hulanda, St. Maarten, Corsou y Aruba a dialoga riba con maneha esaki y yega na e infrastructura y recursonan necesario.

Despues di a ricibi un presentacion riba e ultimo desaroyonan di cada pais den reino, e prome sesion di e consulta interparlamentario a bay di biaha pa toca temanan importante manera ta COHO y Landspakket. Adicionalmente, a nota con e nivel di sensibilidad a aumenta ora cu a papia di sclavitud y colonialismo; un topico cu ta bin bek riba agenda pa diahuebs proximo. “Ta topico cu a touch hopi di e islanan, pero tambe di banda di Hulanda,” asina Croes a expresa indicando cu den e sesion a papia di colonialismo moderno.

Manera ta conoci, algun luna atras gobierno Hulandes a pidi disculpa na e islanan pa e pasado di sclavitud. Y aunke no tur isla a acepta e disculpa, Hulanda a pone un fondo disponibel pa tur na balor di 200 miyon florin, como compensacion, pa inverti den diferente proyecto.

Ora cu a papia di e fuentenan di inmigracion ilegal, e parlamentario a cuestiona e secresia cu cual a trata henter e asunto aki y esun di reapertura di frontera cu Venezuela. “Por resumi cu tur e islanan tin un reto hopi grandi y nos ta wak cu e pregunta ta bira: con nos ta bay pak esaki aan y kico ta infrastructura y e recursonan financiero cu e islanan tin pa por soluciona, of en todo caso soluciona e retonan mas principal cu tin pa loke ta inmigrante?”

E Interparlamentaire Koninkrijksoverleg (IPKO) ta un encuentro bi anual cu ta tuma luga un biaha na Hulanda y otro den e Caribe Hulandes y ta conta cu e participacion di delegacionnan parlamentario for di Eerste y Tweede Kamer, parlamento di St. Maarten, Corsou y Boneiro. E reunion a cuminsa diamars y ta conclui diahuebs awo.

Reparticion di poder y falta di reconoce paisnan den reino como igual ta trece sentimento mixto y marga ora yega na e topico di sclavitud y colonialismo.

Falta di igualdad ta produci sentimento mixto ora ta papia di sclavitud y colonialismo.