Mr. drs. Richard Arends a huramenta como vakminister den Gabinete Eman II

Den oranan di diamars atardi mr. drs. Richard Arends (36 aña) a wordo huramenta pa Gobernador di Aruba Refunjol como vakminister den Gabinete Mike Eman II. Esaki a sosode den presencia di su casa, yiunan, mayornan, Prome Minister Mike Eman y demas coleganan minister. Manera ta conoci den un tempo cortico Gabinete Mike Eman a nombra dos minister.

A haci algun cambio den e carteranan existente. Prome Minister Mike Eman tin banda di su cartera di AZ, cultura y sector primario na su encargo, Minister de Meza Turismo, Medio Ambiente, Transporte y Energia, mientras cu Minister Arends a haya e cartera di Asuntonan Economico y Telecomunicacion.

Minister Arends no ta un desconoci den Bestuurskantoor. Pa mas di shete aña e ta trahando como Chief of staf di Minister de Meza y consehero principal di Prome Minister Mike Eman. Minister Arends a guia henter e proceso di reapertura di refineria CITGO  y ta Chairman of the Board di e Compania Arubano di Petroleo (CAP) N.V. Despues di e ceremonia oficial den cas di gobernador Prome Minister Eman y e minister nobo a dirigi algun palabra na prensa cu tabata presente.

Eman: “Mi ta sumamente contento cu nos minister nobo. Mi a anuncia algun siman pasa cu ta bay tin dos minister hoben pa yena vacaturanan habri. Ya caba Minister Plenipotenciario ta den funcion na Cas di Aruba y awe cu huramentacion di e minister nobo di Asuntonan Economico e promesa a keda cumpli. Dos profesional hoben cu a tuma na nan encargo pa bira minister.” Eman tabatin masha hopi palabra bunita y di elogio den direccion di e minister nobo. Un persona dedica, inteligente cu a desaroya como President di FESCA hopi di e ideanan cu gobierno a bin ta ehecutando desde prome Gabinete Mike Eman caba. Cu un abraso fuerte Minister Eman a felicita su colega nobo y a yam’e bon bini den su Gabinete.

Minister Arends: “Pa mi ta un honor y privilegio di a wordo acerca pa forma parti di Gabinete Mike Eman II. Durante e ultimo shete añanan mi tabata hopi cerca di decisionnan tuma, pero esaki ta sinembargo algo otro. Awor mi a crusa e liña sagrado entre un consehero y un mandatario y pa tuma e responsabilidad pa fungi como minister. E energia t’ey, e gana t’ey y tambe e dedicacion t’ey pa sigui traha y facilita di cualkier manera pa e cifranan economico wordo crea, pa sigui diversifica nos economia y caba di capitalista riba tur e inversionnan haci tanto den turismo como den e refineria pa por logra e cifranan di crecemento economico.” Minister Arends a bisa cu su posicion ta pa e periodo di nuebe luna pa caba di complementa e termino aki. Su intencion te cu awor no ta pa drenta politica activo.