Ursell ta un politico hopi peculiar… Pa añanan largo el a traha riba e plataforma di contenido y medio ambiente y awo e unico cos cu e por anuncia pa cu su maneho di desperdicio delinea den su prome 100 dia ta: “Ta trahando activamente riba plan pa sanea e problematica compleho di desperdicio.” Na unda e contenido a keda? Cu e frase aki Ursell ta comunica cu – despues di añas di ta bende “politica nobo” – ainda e no a haci su huiswerk pa cu tur e problemanan di dump.

Ruman, tuma un tiki tempo pa lesa e PAHO-rapport y e Carmabi-rapport. Anto e ora bo lo tin mas cu suficiente material pa informa Pueblo cu dump ta un ‘ticking time bomb’ y nos piscanan cerca di costa zuid ta glow-in-the-dark pa motibo di tanto toxico den awa. Anto ainda no a papia di e hecho cu contaminacion fecal ta haci nos playanan bunita un health hazard. By the way e PAHO rapport ta duna suficiente guia pa cu e solucion di dump.

Pa tur cu kier un tiki mas informacion, lamentablemente e website di RAIZ tambe ta desapunta. Tin e siguiente articulo pa dia 15 di november 2021: “Minister Ursell Arends ta delinea maneho di naturalesa y medio ambiente”

https://raizaruba.com/minister-ursell-arends-ta-delinea-maneho-di-naturalesa-y-medio-ambiente/

Lesa pa bo mes con un hende por papia hopi, bisa nada. Ningun contenido, ningun plan, ningun timeline concreto. Nada pa nos por huzga e maneho di berdad. Locual e articulo si tin ta mercadeo:

‘“A yega ora pa duna nos naturalesa y medio ambiente e balor y respet cu e merece”, Minister Arends ta opina, señalando un cambio den mentalidad y e ideologia anticua di desaroyo a costo di naturalesa. “Sin naturalesa no tin bida y cu bon guia desaroyo facilmente por bai man den man cu naturalesa. Esey ta nos responsabilidad pa futuro generacionnan”.’ Kico esaki kiermen?

Otro stokpaardje di Ursell ta integridad. Pero ora un reportero ta puntra Ursell tocante nepotismo na Lighthouse aparentemente e no tabata sa su contenido. Awo, den 100 dia di gobernacion ta prensa y oposicion a bin ta cuestiona integridad di señora Evelyn Wever-Croes y su gabinete, pa motibo di e conflicto di interes miyonario di minister Endy Croes, e deal biyonario di LNG, e nepotismo den companianan estatal etc. Ta Kamperveen a obliga henter partido RAIZ pa papia di e falta di transparencia y integridad den e LNG-deal.

Ora cu Ursell a drenta Cocolishi el a core sconde bao mesa pa 100 dia. Ni ora un reportero a pone un mic bao di su nanishi e tabata tin durf pa papia. E ta ponemi corda Scooby Doo. Scooby Doo ta tof, pero cada biaha cu e ta mira un spirito e ta tembla di miedo y ta sconde: Scooby Doo. Where are you!? Ora otro hende ta soluciona e misterio, e spirito ta resulta di ta un simpel persona corupto of un ladron. E ora Scooby ta bira tof atrobe. Awo, despues di tabata missing in action Ursell ta core gaba cu e ta e persona cu a pone integridad riba mapa: “Si por califica un logro den e periodo aki ta cu e palabra integridad a cuminsa haya mas bida den nos comunidad.” Ruman, ta Mito Croes q.e.p.d. ta esun cu a pone principionan di bon gobernacion riba mapa. Pero locual berdaderamente a duna un empuhe na e palabra integridad tabata La Integra mes. Sin embargo ni señora Evelyn Wever-Croes ni RAIZ kier splica e principionan di bon gobernacion, manera e zorgvuldigheidsbeginsel, e “fair play”-beginsel of e draagkrachtige en kenbare motivering. Locual ta haci nan caso pio ta cu nos Prome Minister a bisa cu e por cambia ley den 5 miniuut, pero ora ta trata di BIA nos ta bayendo pa 5 aña. Ta te awo Ursell ta informa: “Nos ta logrando pa finalisa e Landsverordening Bureau Integriteit”. Pa completa obra e declaracionnan di Ursell ta mustra un biaha mas cu señora Evelyn Wever Croes aparentemente tin un problema patologico: den Parlamento e ta gaba cu el a bin cu Corporate Governance Code mientras Ursell ta bisa: “Ministerio di Integridad ta trahando di cerca cu Commissie Corporate Governance pa finalisa e Landsverordening Corporate Governance.”

Pa mas informacion encuanto principionan di bon gobernacion lesa: https://www.infomil.nl/vaste-onderdelen/onderwerpen/lucht-water/handboek-water/handreiking-lozingen/procedure-keuze-rechtsbescherming/algemene-beginselen-behoorlijk-bestuur/