Ayera, dia 7 di december 2021, Minister Xiomara Maduro a tuma nota cu e kimamento di taira riba tereno di e dump na Parkietenbos tabata causando un holo insoportabel pa ciudadanonan den e area.

Minister Xiomara Maduro no a core pidi un reunion di urgencia cu su coleganan. Minister Xiomara Maduro a core post riba Facebook cu Gobierno ta victima di e huma: “Como Minister di Finansa ta mi deber di informa cu cada candela riba DUMP segun un sentencia reciente di Hues ta costa Pueblo 5450 florin pa dia na daño di perhuicio. #MinFIC Cada candela cu huma riba dump na Parkietenbos ta costa Land Aruba Afls. 5.450,00.”

E post aki ta cinico, pasobra e ta demonstra cu minister Xiomara Maduro ta consciente cu segun ley e ta ilicito pa causa daño na otro (articulo 6:162 di e Codigo Civil). Si bo viola e obligacion aki hues por obliga bo pa paga daño y perhuicio. Tambe hues por trata na obliga bo pa cumpli cu bo deber door di impone un suma cu bo mester paga si bo no cumpli (un dwangsom).

A pesar cu e minister ta consciente cu mester cumpli cu ley, e minister tambe sa cu Gabinete Wever-Croes no ta sinti ningun urgencia pa cumpli cu e ley aki. Gabinete Wever-Croes sa tambe cu e Hinderverordening ta un ley cu ta regla molester di entre otro huma y holo. Den articulo 1 di e ley aki ta stipula cu ta prohibi pa opera un establecimento cu ta causa molester di huma sin cu tin un permiso di e Minister di Husticia y Obras Publico. E permiso ta supose di ta un herment pa e Minister por sigura cu un operacion no ta causa daño innecesario na e habitantenan den cercania. Un Gabinete cu ta integro, cu tin respet pa ley y respet pa medio ambiente ta percura pa Serlimar cumpli cu e Hinderverordening. Esey lamentablemente no ta e caso. Serlimar ta opera e dump sin e permiso aki.

Como cu Gabinete Wever-Croes no ta sinti ningun urgencia pa stop actonan ilicito, señora Anouk Balentina a haya su mes obliga pa pidi hues pone un stop na e violacion di derechonan di e habitantenan rond di Parkietenbos. Hues a confirma riba dia 21 di augustus 2020 cu huma por ta un daño pasobra e por ta malo pa salud. P’esey hues a dicta cu Pais Aruba ta responsabel pa e acto ilicito di permiti huma bay riba e habitantenan rond di Parkietenbos. Hues a ordena Pais Aruba pa, manera biento bira, haci tur esfuerso pa paga tur candela riba dump. Si Gobierno no cumpli cu su deber, señora Balentina por paga deurwaarder pa deurwaarder notifica cu Pais Aruba no ta cumpli cu su obligacion y p’esey Pais Aruba mester paga un dwangsom na Rode Kruis.

E sentencia ta bunta, pero despues di e sentencia nada a cambia. Desde augustus 2020 nos por mira riba cierto dianan con huma ta sigui bolter den e bisindario di Parkietenbos. Luna pasa, dialuna 15 di november 2021, un nubia skur di huma tabata colga riba e area di Parkietenbos. Ayera, diamars 7 di december 2021, ni un luna a pasa ainda y atrobe huma ta bolter. Mientras tanto minister Xiomara tabata wak conmocion riba Facebook y asina a mira un oportunidad pa un tiki engagement riba social media. Lamentablemente esey tabata su unico preocupacion: ni minister Xiomara Maduro ni su coleganan no a coy un telefon pa pidi Serlimar pa stop e kimamento di taira riba tereno di dump. Nan tur sa cu señora Balentina no ta miyonario y cu ningun simpel trahado tin suficiente placa pa keda scupi 450,00 AWG tur luna pa trata na obliga Gobierno cumpli cu ley. No ta resta señora Balentina mucho mas cu go live riba Facebook y trata pa haya atencion pa e situacion. Hustamente esey ta crea e trend pa e ministernan core post: “Gabinete Wever-Croes ta integro, ta cumpli cu ley y ta pone e ser humano central!” Ban ta serio!