Diabierna awo, 25 di augustus, Aruba Bodybuilding & Powerlifting Association lo tene nan competencia anual di Mr. Aruba National Body Building and Fitness Championship 2017. Un competencia di bodybuilding y fitness di nivel super halto cu nos atletanan local lo ta participando na esaki.
Cada aña e competencia organisa pa e federacion di ABPA ta hala masha hopi atencion unda e asistencia na e evento ta uno grandi. E aña aki e participantenan lo competi den e categorianan di Mr. Aruba, Mr. Aruba Beginner, Women’s Physique y Mens Physique, Ms. Aruba Body Fitness and Bikini.
Algun siman atras e federacion di bodybuilding a score cu e evento renombra di bodybuilding y fitness, esta e Ben Weider Caribbean Classic Aruba 2017. E evento internacional di bodybuilding y fitness cu sin duda a haya su acohida cu un total di 90 participante local y internacional. Pa prome biaha nos dushi isla a conta cu un evento di taya mundial manera e Ben Weider y cu a conta cu presencia di e presidente di e federacion internacional di bodybuilding y fitness IFBB, Dr. Rafael Santonja. Es mas Aruba su atletanan femenino a hasta logra conkista premionan historico cu Monica Sanchez kende a logra e titulo maximo di e IFBB Bikini and Fitness Overall Champion y Michelle Portier cu a triunfa den e categoria Women’s Physique.
