Movemento Dominicano Uni na Aruba a inicia un campaña di solidaridad pa yuda e famianan cu actualmente ta den situacion dificil debi na e efectonan di e crisis di coronavirus/Covid-19.
Ramon Valdez a declara na Bon Dia Aruba cu hunto cu ne tin dos persona mas, Vanessa Ogando y Kendry Rosario, cu a dicidi busca donacion pa asina traha macutunan di alimento y tambe articulonan di limpiesa pa reparti cerca e famianan cu mas necesidad. E productonan di limpiesa ta yuda pa nan tin nan cas higienicamente bon
Durante e weekend ultimo, nan a entrega 60 macutu cu un variedad di productonan. Valdez a declara na e matutino aki cu via nan pagina di Facebook: Dominicanos Unidos en Aruba, nan a logra traha un lista di e famianan cu tin mester di ayudo di alimento pa tuma contacto cu nan libremente. “Nos ta brinda ayudo na e hendenan cu mas mester di dje.”
P’esey e movemento aki ta haci un yamado na tur instancia, ya sea comercial of particular, pa nan por sigui conta cu e donacion y colaboracion. Sin e donacion aki nan no por sigui yuda tur e hendenan di nos comunidad cu ta tuma contacto cu nan via e telefon di nan movemento.
Actualmente nan tin un lista caminda nan ta duna prioridad na e famianan cu tin mas necesidad. “Nan tur ta hayando algo,” el a bisa. Pero e necesidad ta grandi y actualmente nan tin un lista largo.
Cada macutu tin un variedad di producto basico y otro productonan mas, manera aros, zeta, grano, pasta, cuminda di bleki, etc… El a bisa cu si e hendenan ta haci uzo consciente di e macutu di alimento aki, e por yega un siman of dos siman. E ta depende di e cantidad di hendenan cu cada famia tin tambe
