Ayera un MoU a keda firma entre gobierno, representa pa Minister di Enseñansa, Rudy Lampe; Minister di Turismo, Dangui Oduber; y Vice Presidente di American Hotel & Lodging Educational Institute ( (AHLEI), Coutelou Novelo.

Como un momento ‘sumamente positivo,’ Minister Lampe a cualifica e firma di e acuerdo di entendimento aki, cu tin como meta pa e studiantenan di EPI su Unidad di Hospitalidad y Servicio y trahadonan di e sector aki por wordo capacita mas door di AHLEI. Esaki lo contribui pa eleva e calidad di servicio den nos industria hotelero.

Tanto Lampe como su colega Dangui Oduber a mira e importancia di e acuerdo aki, mirando cu nos isla ta depende di turismo cu actualmente ta nos unico pilar economico. P’esey den e deliberacion cu e instituto aki, no solamente minister di Enseñansa, sino Minister di Turismo y tambe e Minister di Asunto Social y Labor, tabata envolvi den e proceso pa yega na e MoU. Pero e mandatario Lampe a bisa cu hunto cu Oficina di Turismo (ATA) y Asociacion di Hotelero na Aruba (AHATA) tambe nan ta co-firmante di e acuerdo aki.

Oduber a bisa cu despues cu nan a haya un splicacion di e programa di certificacion aki, pa turismo e ta algo hopi importante. Turismo ta nos pilar economico y nos ta brinda servicio na nos huespednan, y e nivel y calidad di servicio cu ta wordo ofrece pa AHLEI ta un nivel hopi halto.

Lampe a indica cu pa medio di miho educacion nos lo por eleva e nivel di servicio den nos industria di turismo. E ta haya cu tin masha hopi necesidad di parti di e sector hotelero pa capacita nan trahadonan, y di un instituto manera AHLEI, cu ta rond mundo y ta certifica pa duna diferente tipo di cursonan.

Director General di EPI, Ryan Maduro a bisa cu e acuerdo aki ta un bon oportunidad cu for di aña 2015, EPI su Unidad di Hospitalidad y Turismo a firma un acuerdo di colaboracion cu AHLEI. E ta duna EPI oportunidad pa medio di su Unidad di Hospitalidad y Turismo di ofrece un portafolio di un gran cantidad di programa, certificacion y actualisacion y/of mehoracion pa industria di turismo na Aruba. E ta haya cu tabata importante pa ‘solidifica’ tur e acuerdonan, pa esaki bira e programa principal di actualisacion pa tur esunnan cu ta traha den sector turismo.

E acuerdo aki no solamente ta duna acceso ariba nivel nacional pa training y capacitacion, pero tambe ta pone Aruba como pais bira un di e prome den nos region, cu ta eleva den un standard nacional e nivel di servicio. Maduro ta haya positivo cu tur e partnernan envolvi den e acuerdo aki tin e compromiso pa bin forma parti di dje. “E ta e compromiso nacional di bisa cu aunke nos ta bon, esaki no kier men cu nos no por ta miho,” el a declara.

Novelo di AHLEI a elogia e echo cu Aruba cu ta un destino fuerte y ta den bon posicion pa interesa pa sigui mehora su servicio. Igualmente el a gradici gobierno di Aruba y expresa su orguyo cu AHLEI lo por contribui den e proceso aki.

E industria hotelero global recuri na American Hotel & Lodging Educational Institute (AHLEI) pa obtene e miho capacitacion y educacion pa tur segmento di hospitalidad. Durante mas cu 65 aña, AHLEI a traha pa proporciona e organisacionnan y scolnan di hospitalidad e recursonan di calidad pa capacita, educa y certifica e profesionalnan di la hospitalidad. AHLEI tin su sede na Orlando (Florida) cu sucursalnan adicional na Lansing, Michigan, India y China.