Manera ta tradicion na Aruba, apertura di carnaval ta tuma luga dia 11 di november (11/11). Un fecha cu hopi ta spera pa asina duna inicio na un di e temporadanan mas gusta no solamente pa pueblo di Aruba, pero tambe pa turistanan cu ta bishita e isla.

E aña aki e celebracion di apertura a tuma luga ariba dos dia, esta diabierna 10 di november y diasabra 11 di november, cual tabata e dia di apertura oficial.

Den 2024 Aruba lo ta celebrando e di 70 aña di celebracion di carnaval y pa cu e gran celebracion aki Stichting Maneho di Aruba su Carnaval (SMAC) ta dedica Carnaval 70 na e 60 añanan di carnaval organisa pa Stichting Arubaanse Carnaval (SAC).

Aruba Caiso & Soca Monarch 2024

Den siman, prome cu apertura di carnaval ya caba e celebracionnan carnavalesco a cuminsa. Dia 7 di november a cuminsa cu e pre-finals pa Aruba Caiso & Soca Monarch 2024, organisa pa Stichting Musica.

E cantantenan di carnaval hunto cu e diferente banda musical a presenta nan cancionnan pa loke ta e competencia di e musica di carnaval y ya caba e lista di cantantenan cu a avansa pa e gran final den e categoria soca a wordo anuncia.

Mester remarca cu e aña aki e categorianan ta un poco diferente na locual ta custumber. E categoria di soca, a wordo dividi den dos sub-categoria, esta ‘power soca’ y ‘groovy soca’. Den e categoria di ‘power soca’ tin un total di 25 cantante cu a clasifica y den e categoria ‘groovy soca’ 15 cantante a clasifica pa e gran final.

Un participante cu a causa un conmocion den pueblo di Aruba tabata e cantante The Priest, esta e conocido pastoor di Misa Imaculada Concepcion di Santa Cruz, pastoor Jairo Maduro.

E participacion di e pastoor a causa un avalancha di reaccion y opinion ariba rednan social, cu algun persona criticando fuertemente e pastoor su decision pa participa den un festival cu ta parti di celebracion di carnaval, cu hopi persona ta considera como un ‘celebracion di diablo’.

Hopi otro persona a felicita e pastoor pa su participacion y a apoya su decision, indicando cu e no a haci nada malo y cu e ta disfruta di un fiesta cultural di Aruba manera cualkier otro persona na Aruba.

Mester remarca cu despues di su presentacion hopi hende a elogia e pastoor su presentacion y cantica. Hopi ta esnan cu a gusta y disfruta di e melodia di e cantica di ‘The Priest’.

No ta prome biaha cu pastoor Jairo Maduro ta ricibi critica. Den luna di januari durante celebracionnan di carnaval 69 ya caba e pastor tabata e punto di hopi critica pa motibo cu a mir’e ta jump patras di e truck di last lap den parada di carnaval.

Pa hopi esaki ta keda un debate y e opinionnan ta keda dividi. E banda conservativo y religioso ta keda completamente en contra di un pastoor su participacion den celebracion di carnaval y e banda mas liberal cu ta di acuerdo y ta apoya e pastoor.