Diamars cinco prizonero a muri durante un motin, na un prizon di estado di Mato Grosso, region centro occidental di Brasil, autoridad a informa.
Otro 17 prizonero a keda herida durante e incidente, cu a sucede na prizon Osvaldo Florentino Leite Ferreira, departamento di seguridad di estado a informa den un comunicado .
Cuatro prizonero a muri di varios tiro cu arma di candela, otro di nan a muri di un atake cardiaco. Autoridad a haya dos arma di candela den prizon. Joao Batista, presidente di Sindicato di Agente Penitenciario di Mato Grosso, a declara cu e prizoneronan a cuminsa pleita entre nan pa causa desconoci, aunke autoridad tin sospecho cu e prizoneronan tabatin intencion di cana cerca di muraya di prizon y asina purba huy.
Actualmente penitenciaria di Sinop tin cerca di 700 prizonero, aunke capacidad di e prizon aki ta pa 326 prizonero. Den e prizon ta biba miembro di dos grupo criminal cu ta rival. Miembronan di e bandanan ey ta separa den area diferente.
E motin a finalisa y autoridad a negocia pa tuma e control bek den e zona, unda a presenta e bringamento.
Brasil ta bibando un serie di motin den henter e aña aki, caminda a muri decenas di prizonero. E violencia a genera hopi pregunta tocante situacion den e prizonnan di e pais, unda hopi biaha ta aumenta drasticamente e cantidad di prizonero, cu poco personal y cu ademas ta bao control di pandiya.
Brasil ta e di cuatro pais cu mas poblacion den prizon rond mundo, despues di Merca, China y Rusia.
