E duro bataya di Chadwick Boseman contra un cancer di colon tabata conoci solamente pa su circulo mas intimo. E protagonista di ‘Black Panther’ tabata mantene speransa te su ultimo dia. El a mustra su mes optimista y tabata pensa cu lo vence e malesa.
Desafortunadamente, e no a logra. CU 43 aña di edad, Boseman a fayece dia 28 di augustus despues di un lucha silencioso di cuatro aña.
Un fuente a bisa The Hollywood Reporter cu e actor tabata ‘convenci te un siman prome cu su morto cu e lo vence e cancer y por a recupera suficiente peso pa e secuela di ‘Black Panther’, cu tabata programa pa cuminsa produccion na maart’.
Mientras e tabata lucha contra su malesa, e actor a traha den shete pelicula. Boseman a ricibi diagnostico di cancer di colon den tercer etapa na 2016. El a preferi pa tene esaki priva y a sigui su carera trahando pa Marvel. El a protagonisa ‘21 Bridges’ y a acepta join Spike Lee den e pelicula di Netflix, ‘Da 5 Bloods: Brothers in arms’.
“Solamente un grupo chikito cu no tabata famia tabata sa cu Boseman tabata enfermo, incluyendo su partner Logan Coles, su agente Michael Greene, su trainer Addison Henderson y director Brian Helgeland. Niun hende involucra cu ‘Black Panther’ tabata na altura”, segun un fuente.
Henderson y su antiguo agente Michael Greene a revela detayenan di su bataya priva despues di su morto impactante. Den un entrevista cu THR nan a splica cu Boseman a tene su diagnostico priva riba peticion di su mama, Carolyn. “E semper a siñ’e pa no laga hende preocupa p’e. E tabata un persona hopi, hopi reserva”, Greene a splica. El a agrega cu Boseman a ‘sufri hopi’ filmando ‘Ma Rainey’s Black Bottom’, su ultimo pelicula, pero cu e ‘tabata sinti cu ta cu Denzel Washington y lansa e ciclo dramaturgo aki di August Wilson riba Netflix tabata hopi emocionante p’e.”
