Bon Dia Aruba a sigui riba e asunto di e compania Mota Engil y trucknan local. Tin un renion pendiente ainda. Pero locual nos ta compronde for di e compania principal mes encarga cu e construccion di Watty Vos Boulevard ta cu e trucknan local mester zorg ainda cu nan papel ta na ordo.
Director di Mota Engil, Joao Campos Forte a laga sa cu e companianan local y chauffeurnan independiente di trucknan cu ta wordo contrata, no por subi riba caminda te ora cu nan tin tur nan documentonan entre nan asunto di belasting y seguronan paga na ordo. Igualmente nan mashinnan lo wordo opera pa trahadonan local y nan ta como backup. Tampoco e trahadonan cu no tin nan documento na ordo di Aruba, no lo wordo contrata.
E ta haya cu e trucknan local no tin problema tecnico of mecanico; pero nan mester ta sigura pa un compania local y nan mester ta na ordo cu nan belasting. El a laga sa cu nan a paga tur impuesto pa importa nan ekiponan pa uzo temporal. Aunke nan sa kende lo opera e ekiponan aki, e trahadonan aki no a wordo contrata ainda; ya cu ainda nan no tin trabou pa nan haci aworaki.
Den combersacion cu departamento DOW a tene cu e compania Mota Engil a wordo trata e punto cu si nan ta importando mas mashin pisa of trucknan di afo, nos a compronde. Banda di loke a yega na nos waf; director di DOW, Marlon Croes a laga sa categoricamente cu e compania menciona no tin pensa di importa mas mashin. “No tin mas mashin ta drenta. Tur loke tin akinan ta na Aruba caba.”
Sinembargo sr. Croes a bisa di antemano cu si mester drenta un mashin mas cu no tin na Aruba. El a splica cu ta un sistema nobo di resurface e careteranan y na Aruba no tin un mashin asina. E mashin ta programa pa bini na fin di 2018.
Encuanto e participacion di sindicato STA pa representa e companianan manera Arubaanse Wegenbouw y Thiel Corporation, ademas di e chauffeurnan independiente di truck, sr. Croes a laga sa cu ta nan derecho si nan kier sinta hunto. DOW a ricibi un carta for di sindicato STA cu a solicita un reunion cu ministernan Benny Sevinger y Angel Bermudez; y cu sr. Croes mes como director di DOW. E reunion aki tabata programa pa ayera tardi pero un dia prome a wordo posponi pa dia 2 di augustus.
Sr. Croes no ta haya cu lo tin un motibo pa nan ta preocupa pa un eventual accion manera ya caba a yega di sosode. E echo cu otro siman lo tin un reunion cu sindicato STA pa papia di e desaroyo di e dos proyecto grandi cu ta tumando luga, Green Corridor y Watty Vos Boulevard. Sr. Croes a bisa cu nan a yega na un areglo caba cu e chauffeur independiente di truck; pero di tur manera nan kier scucha e preocupacion di e sindicato STA den presencia di e dos mandatario. Despidiendo di e reunion nan ta bay wak con e proceso ta bay sigui.
