(AP) – Alcalde di Moscu a ordena un siman liber pa algun establecimento y a impone restriccion riba hopi negoshi pa por combati e plamamento di coronavrius cu den e siman pasa a dobla den cantidad.

E ekipo nacional encarga cu coronavirus a reporta 6,701 caso confirma nobo di coronavirus na Moscu, compara cu e cifra di 2,936 reporta ultimo riba dia 6 di juni. Nacionalmente, e totalidad diario a aumenta cu casi mita durante e siman pasa subiendo e cantidad te 13,519.

Despues di algun siman den lockdown mientras cu e pandemia tabata plamando, e capital di Rusia a kita hopi di e restriccion nan y prohibicion nan y no a bolbe pone ningun durante e aumento di casonan, pero pa motibo cu diripiente e casonan a aumenta radicalmente el a bira “imposibel pa no reacciona den un caso asina” Alcalde di Moscu Sergei Sobyanin a bisa.

El a ordena companianan cu no ta habri durante weekend pa permanece cera durante e siman pero cu pago pa e empleadonan. Cafeteria y area di hunga pa muchanan den centro nan pa shop tambe ta di permanece cera entrante diadomingo, mientras cu restaurant y bar lo mester limita nan servicio pa solamente take-away di 11pm te cu 6am.

Den comienso di e siman autoridadnan di e ciudad a publica cu lo reenforsa uso y rekisitonan di mask y handschoen den transporte publico, tiendanan y otro luga nan publico, agregando cu cualkier persona cu no cumpli cu e reglanan aki lo ricibi un boet di 5,000 ruble cual ta un ekivalente di 70 dollar.

Aunke Rusia ta tabata e prome pais cu a lansa uso di vacuna contra coronavirus, e uso ta sumamente abao pa motibo cu hopi Ruso ta duda y desconfia den e vacuna.

President Vladimir Putin a bisa riba diasabra cu 18 miyon di Ruso a ricibi e vacuna, cual ta solamente 12% di e populacion.

Durante henter e periodo di e pandemia e ekipo dedica na esaki a reporta casi 5.2 miyon di infeccion den e pais cu tin 146 miyon hende, cu 126,000 di esaki resultando den fayecimento. Sinembargo, un reportahe di un agencia di estadisticanan nacional Ruso yama Rosstat a constata cu tin mas di 144,000 morto relaciona cu virus den aña pasa so. Contrario di e ekipo dedica na e pandemia, e agencia ta conduci nan reportahe a base di cualkier morto unda cu ta confirma of sospecha e presencia di coronavirus pero no cu esaki ta specificamente e causa di morto.

E reportahe a revela cu mas o menos 340,000 mas hende a fayece den 2020 compara cu 2019. Sinembargo no ta duna detaye tocante e causa exacto dicon e fayecimento nan a aumenta di tal manera.

E cantidad aki di fayecimento combina cu e cantidad di nacemento cual tambe a baha ta haci cu e populacion a bay atras cu 702,000, cual ta dobel di e cantidad den aña 2019, Rosstat ta declara.