(AP) — Kremlin ayera a adverti cu e decision di presidente Joe Biden pa permiti Ucrania ataca obhetivonan dentro di Rusia cu misilnan di rango mas largo suministra pa Merca ta tira “fuel riba e candela” di e guera y lo escala tension internacional mas ainda.
E cambio di politica di Biden a agrega un factor incierto, nobo na e conflicto den bispo di e aniversario di mil dia desde cu Rusia a cuminsa su invasion di escala completo na 2022.
Tambe a yega mientras un misil balistico Ruso cu municionnan cluster a dal un area residencial di Sumy den nort di Ucrania, matando 11 persona incluyendo dos mucha, y heridando otro 84. Otro atake di misil a pega apartamentonan na candela den Odesa, matando al menos 10 hende y heridando 43, incluyendo un mucha, segun ministerio di Interior Ucraniano.
Washington ta suavisando e limite riba kico Ucrania por ataca cu su Sistema di Misil Tactico di Ehercito (ATACMS), traha na Merca, segun oficialnan Mericano a bisa AP diadomingo, despues di lunanan descartando un movida asina pa miedo di escala e conflicto y trece confrontacion directo entre Rusia y NATO.
Kremlin tabata rapido pa duna su condena.
“Ta obvio cu e administracion saliente na Washington tin intencion pa tuma stap y nan ta papiando riba esaki, pa continua tira fuel riba candela y provoca mas escalacion di tension rond di e conflicto aki,” vocero Dmitry Peskov a bisa reporteronan.
E alcance di e guianan nobo pa tiramento no ta cla. Pero e cambio a yega despues cu Merca, Sur Korea y NATO recientemente a bisa cu trupanan Nort Koreano ta na Rusia y aparentemente ta siendo desplega pa yuda ehercito Ruso saca trupanan Ucraniano for di region fronteriso Kursk di Rusia.
Rusia tambe ta poco poco pushando e ehercito Ucraniano patras den region Donetsk. Tambe a conduci un campaña aereo devastador contra areanan civil na Ucrania.
Peskov a referi periodistanan na un declaracion di presidente Vladimir Putin na september, den cual el a bisa cu permiti Ucrania ataca Rusia lo eleva e riesgo significantemente. E lo cambia “e propio naturalesa di e conflicto dramaticamente,” Putin a bisa e tempo ey. “Esaki lo nifica cu paisnan NATO – Merca y paisnan Europeo – ta den guera cu Rusia.”
Peskov a bisa cu paisnan occidental suministrando armanan di rango largo tambe ta provee servicionan di obhetivo na Kyiv. “Esaki fundamentalmente ta cambia e modalidad di nan involucramento den e conflicto,” el a bisa.
Putin a adverti na juni cu Moscu por provee armanan di rango mas largo na otronan pa ataca obhetivonan occidental si NATO permiti Ucrania usa armanan di su aliadonan pa ataca teritorio Ruso. Tambe el a reafirma e preparacion di Moscu pa usa armanan nuclear si ta mira un menasa contra su soberania.
