Rusia ta exigiendo pa Merca duna accesoo na dos mansion diplomatico cu a wordo confisca door di Merca aña pasa. Vocero di Kremlin Dmitry Peskov a bisa cu no ta acceptabel pa pone condicionnan riba e regreso di e propiedadnan aki. Minister Sergei Lavrov a describi esaki como “ladronicia den dia cla”.
Rusia conhuntamente cu oficialnan Mericano ta discutiendo e asuntonan aki den reunionnan basta serio. Siman pasa Rusia tabata considerando ‘medidanan specifico’ pa trata cu e asunto aki, incluyendo expulsion di 30 diplomatico Mericano y confisca propiedadnan Mericano. Ex Presidente di Merca Barack Obama a actua contra Rusia despues cu fuentenan di inteligencia Mericano a acusa estado di Rusia di hack den e computernan di e partido Democratico pa perhudica campaña presidencial di Hillary Clinton.
E situacion aki awor ta un menasa pa e relacion entre Merca y Rusia, cu ya caba no ta uno mucho positivo, si en berdad Rusia mester suspende diplomaticonan Mericano. Tumando na cuenta tambe henter e asunto di posibel intervencion di Rusia den eleccionnan Mericano, cu ya caba tin e situacion entre Rusia y Merca poco tenso.
