DEN HAAG – E corte Malay investigando e morto di e modelo Hulandes, Ivana Smit, a declara cu su morto tabata un accidente, segun abogado di su famia, Sebas Diekstra.
Ivana a wordo haya morto bou di un balcon na e di 20 piso di un blok di apartamento na e capital Kuala Lumpur, dia 7 di december 2017. E hoben di 18 aña di edad tabata bishitando un pareha Mericano den e apartamentonan despues di un anochi di fiesta.
Autoridadnan di Malaysia prome a bisa cu su morto tabata un accidente, pero un patologo Hulandes, kende a examina su curpa, a haya discrepancia cu e version oficial di e suceso.
Frank de Goot a bisa cu el a haya heridanan cu a sucede prome cu el a cay for di e balcon, y un falta di sanger na e luga unda el a wordo haya ta sugeri cu e tabata morto caba.
Famia di e hoben tambe ta convenci cu e morto di Ivana no tabata un accidente, y a ofrece un recmpensa di $50,000 na cualkier persona cu por duna informacion cu lo conduci na e persona responsabel.
“Hues a considera e opcion di un crimen, mirando cu tin un cantidad di indicacion, pero a bisa cu e no por establece kico a pasa entre Ivana y e pareha”, Diekstra a bisa. E pareha a nenga cualkier participacion den su morto, pero preguntanan tambe a wordo lanta contra nan testimonio. Despues, a Sali na cla cu nan a haci nan apartamento limpi despues di morto di Ivana.
