Dia 24 di october ultimo, Aruba a conoce e lamentable noticia di un hoben di 16 aña cu segun otro medionan social a reporta, a dicidi di kita su bida mientras e tabata deteni na Warda di Polis di Shaba.
E medionan di comunicacion a indica cu aparentemente e hoben tabata ser busca pa ladronicia, y pa e motibo aki el a keda deteni y tabata den warda na Shaba.
Por a mira diferente reaccion riba rednan social relaciona cu e caso aki. Entre nan, esun di e abogado di e famia di e hoben, Desiree Croes, ken riba su rednan social a expresa su mal contento pa loke ta trata ayudo pa hobennan cu ta den dificultad
“Di esaki mi ta zundra tur dia! No por!! Kico nos kier haci? Caba cu nos hobennan of yuda nan?
Awe recherche kier a laga cera mucha di 12 aña y segun nan den opdracht di fiscal! Pone presion pa e admiti algo cu e no a haci. Inaceptabel!” Croes a indica.
Ademas, el a haci un yamado na Parlamento, comision di Husticia, pa lanta ariba y cuminsa haci pregunta. “Please, no laga e caso aki tambe bay den doofpot.”
Croes, den su opinion, ta sigura cu e “condicionnan den celnan na Aruba ta fatal, sushi, chikito, hopi hopi calor, ta keda sin duna nan awa ora nan ta sclama di sed. Bo por a haci malo, y merece castigo y mester por cuida comunidad contra cierto personanan berdad, pero mester tene na mes momento cuenta cu presonan tambe tin derechonan humano. Y e situacion den cellencomplex na politiebureau na Aruba ta inhumano!”
Ademas, el a bisa cu ora ta trata di un persona hoben, cu problema di depresion, cu ta detentie-ongeschikt por y mester por mand’e cas of Respaldo pa e warda tratamento di su caso na cas.
Ta preguntanan cu ta keda den comunidad pa casonan aki unda menornan di edad ta keda deteni den celnan aki cu manera un abogado mes ta bisa, no ta apto ni adecua pa ni un hende pa loke ta trata derechonan humano.
