– Den cuadro cu morto di futbolista Johnny Gomes cu a sosode siman pasa na Kruisweg na altura di e club nocturno Maxim, segun vocero di Ministerio Publico ta bisa Bon Dia tin sospecho cu e caso aki ta un homicidio y no un caso di asesinato pa motibo cu ta parce di ta un situacion di pelea cu a sali for di man.
Diasabra dia 30 di Juli a sosode un incidente cu a cuminsa cu un pelea cu machete banda di Maxime Bar
situa den Kruisweg na Playa cual ta practicamente dilanti di Warda di Polis na Playa. Ora cu Polis a yega e sitio a constata cu e victima en berdad no tabata dunando señal di bida como cual pa 4:55am Dr. Lin a constata morto di Sr. Johnny Gomes kende tabata naci na Aruba, 33 aña di edad y tabata hunga pa e ekipo di futbol SV Caiquetio di Paradera. Segun Ministerio Publico, tin tres detencion cu a tuma luga. Riba diasabra, polis a detene e homber cu a entrega su mes na warda. Riba diadomingo a detene dos otro persona, un homber y un muher. Net despues di e sucedido, patrouille a detene un persona na e sitio mes cu a wordo laga liber despues segun Ministerio Publico.
E sospecho ta homicidio
E caso aki no mester wordo mira den luz di un likidacion of den ambiente criminal segun Ministerio Publico. E ta mas bien un pelea cu a sali for di man y cu tabata tin como consecuencia morto di un persona. E autopsia di e curpa a tuma luga dialuna cu a pasa.
