(AP) — Betty White a fayece di un atake cerebral cu el a sufri seis dia prome cu dia di su morto, 31 di december, na edad di 99 aña – segun su certificado di fayecimento.
E actriz stima, di ‘Goldern Girls’ y ‘Mary Tyler Moore Show’ a fayece na su cas den seccion Brentwood di Los Angeles como resultado di un accident cerebrovascular dia 25 di december, e termino medico pa un atake cerebral, segun e certificado di fayecimento di Condado di Los Angeles obteni dialuna pa AP.
Dokter di White a provee e causa, manera ta tipico den casonan asina.
A haci cremacion y su restonan a keda entrega diabierna ultimo na Glenn Kaplan, e homber a cargo di e directiva di cuido di salud avansa di White.
Jeff Witjas, agente y amigo di hopi tempo di White, kende prome a confirma su morto na AP, a bisa cu e tabata kedando cerca di su cas na Los Angeles durante e pandemia.
E documento ta lista nomber legal di White, Betty Marion Ludden. El a tuma e fam di su esposo Allen Ludden, cu ken e tabata casa desde 1963 te morto di Ludden na 1981.
E informacion di e certificado di morto a keda reporta prome pa TMZ.
White, kende su talento di comedia y su encanto a hacie un personahe fiho riba television pa mas cu 60 aña, kende tabata celebra pa varios generacion di fanatico, a fayece menos di tres siman prome cu su di 100 cumpleaños.
Presidente Joe Biden, Mel Brooks, y cantidad di otro celebridad y lidernan prominente a duna tributo na White despues di su morto.
