Na fin di januari ultimo minister Xiomara a anuncia cu gobierno a prolonga e moratorio riba establecimento di supermercado (incluyendo minimarket) cu dos aña. E moratorio existente riba supermercado ta termina dia 23 di mei proximo y a wordo prolonga te cu 23 di mei 2021. Esaki ta nifica cu pa e proximo dos añanan lo no duna permiso pa establece supermercado y/of minimarket nobo na Aruba.
E decision di gobierno aki a bini a base di un estudio cu expertonan di Departamento di Asuntonan Economico (DEACI) a haci uzando diferente metodologia durante e ultimo kwartaal di 2018 y asina a bin cu un recomendacion pa gobierno.
E resultado ta cu tin un total di 187 supermercado (incluyendo minimarket) riba Aruba. Pa haya un miho bista a uza Aruba su GIS (Geographical Information System) unda a parti nos pais den region y zona y a haci un analisis di cuanto supermercado tin den cada region. E regionnan Oranjestad West y Oranjestad Oost tin cada uno 39 supermercado y ta e regionnan cu tin mas tanto supermercado. Region di Noord y Tanki Leendert ta sigui cu un cantidad di 36 supermercado. Den e tabel adhunto por haya un bista di cuanto supermercado tin den cada region.
Tambe DEACI a haci un encuesta atraves di Facebook pa haya sa opinion di ciudadanonan pa sa kico nan ta pensa tocante cu si tin ‘di mas’ of ‘di menos’ supermercado den nan bario. Un total di 1.800 persona a participa di cual 94% a bisa cu nan kier menos supermercado riba Aruba. Den e encuesta haci, un di e resultado cu a resalta ta cu 74.5% di e participantenan a indica cu no tin espacio pa mas supermercado den nan bario.
A base di e resultadonan di e estudionan haci, DEACI a recomenda Gobierno pa prolonga e moratorio riba supermercado cu dos aña mas te cu 23 di mei 2021. E resultado di e estudio ta disponibel via e website di DEACI via www.deaci.aw/downloads.
