ORANJESTAD – E moratorio riba supermercado cu a wordo tuma na dia 23 di mei 2017, a wordo extende cu dos aña mas. Kiermen cu pa dos aña largo, no lo bay honra peticionnan pa establece mas supermercado na pais Aruba.
E decision aki, pa no duna permiso pa mas supermercado por habri, a wordo tuma despues cu minister di finansa y asunto economico, Xiomara Ruiz-Maduro, a haya e resultado di un investigacion. Actualmente tin 187 supermercado na pais Aruba y e concentracion mas grandi ta na Oranjestad.
E mandatario a declara cu a base di e encuesta virtual haci, a sali informacion cu ta hustifica pa gobierno tuma den consideracion pa prolonga e moratorio pa supermercado. Ta asina cu departamento economico a haci un investigacion riba e aspecto di e moratorio aki, y su necesidad, durante fin di aña pasa via Facebook. Un parti di e metodologia di e investigacion aki tin di haber cu e parti di sentimento di esunnan encuesta.
E rapport a keda entrega na inicio di e aña aki, caminda un 94% di esunnan cu a participa di e encuesta of investigacion aki a indica cu nan no kier mira mas supermercado. Tambe a haci investigacion den e barionan, pa descubri con e presencia of concentracion di supermercadonan ta den e bario.
