Diaranson Presidente di Bolivia Evo Morales, a pidi su colega di Latino America pa evita continua mesun linea anti – migrante cu Donald Trump ta implementa na Merca. E posicion di Morales ta un contesta dilanti di politica di migracion cu Argentina a wordo implementa contra stranheronan.
“Rumannan presidente di Latino America nos ta un patria grandi, nos no por sigui politica di migracion cu a bin for di Merca. Hunto pa nos soberania y dignidad”, Morales a skirbi riba twitter. Declaracion di presidente di Bolivia a bin manera un contesta pa politica nobo di presidente di Argentina Mauricio Macri.
Macri a decreta normanan cu por facilita mecanismo di salida di tur stranhero culpabel di acusacionnan, esaki ta parti di un medida cu ta busca combati aumento di crimen na Argentina. Minister di siguridad, Patricia Bullrich tambe a declara cu migrante di Bolivia, Paraguay y Peru ta envolvi den delincuencia asocia cu narcotrafico na Argentina.
Declaracion di diputado Argentina Alfredo Olmedo, a cuminsa e polemica aki, ora cu el a papia di construccion di un muraya na frontera di Bolivia cu Argentina, aunke despues el a laga cla cu e tabata papia di un “muraya tecnologico” di control di migracion y no di un muraya realmente.
Minister di defensa di Bolivia, Reymi Ferreira a bisa cu medida di migracion na Argentina por genera “xenofobia, discriminacion y racismo”, y el a bisa tambe cu 13% di persona deteni pa motibo di narcotrafico na Argentina ta stranhero. Un encuesta na Argentina a revela cu 8 di 10 persona ta di acuerdo pa aumenta control di migracion, ora cu hende stranhero ta drenta y permanece na teritorio Argentino. Stranheronan na Argentina ta un 4,5% den 40 miyon di habitante cu Argentina tin.
