Ayera mainta durante un conferencia di prensa directora di Stichting Monumentenfonds Aruba (SMFA), Anne Witsenburg, hunto cu Minister di Cultura y Finanzas, Xiomara Maduro, a anuncia e finalisacion di restauracion di e edificio ex Botica Aruba, situa na Steenweg19.

“E restauracion a yega su final y nos ta yama bon bini na nos huurdo nobo. Mi kier tuma e oportunidad aworaki pa bisa un gran danki na un y tur cu a yuda nos y cu ta contribui na e proyecto aki,” Witsenburg a expresa.

El a splica cu e proyecto aki en particular a tuma hopi tempo y ta eigenlijk e proyecto mas largo cu SMFA tabatin. Tur cos a cuminsa na momento cu e fundacion a cumpra e edificio y a pone esaki disponibel pa artistanan local pa un tempo. Despues a cuminsa cu e restauracion di parti pafo di e edificio, pero despues COVID-19 a yega y a atras trabaonan. Despues di covid e fundacion a cuminsa cu e restauracion di e parti abao di e edificio y aworaki a yega e mmento cu e restauracion a yega su final.

“Kiermen poco poco, pero nos a logra. Semper un proyecto asina ta un esfuerso di full un grupo y nos ta super contento. Mi kier gradici y duna un pabien na nos huurdonan nobo cu ta Cocolishi Studio. Monumentenfonds ta super orguyoso cu nos a cuminsa aporta na negoshinan creativo. Nos a cuminsa cu e chef’s table restaurant cu ta ubica na e parti abao, esta Koal Restaurant, y aworaki Cocolishi Studio,” Witsenburg a resalta.

Minister Maduro a remarca cu e edificio di ex Botica Aruba tin un historia largo, pero tambe tin un historia cu ta haci e anuncio di e huurdonan nobo mas special pa motibo cu e ta un studio.

El a conta cu den pasado tambe tabatin un studio, segun e por a compronde, na unda sr. Edison Croes, un tempo tambe tabata den e parti di musica.

“Awe pa nos esaki ta bunita pasobra tabata un caminda largo, manera cu a wordo bisa. Un caminda largo na unda cu sigur na 2021 nos tabata aki na unda tabatin e restauracion di e casco, pafo di e edificio pasobra paden ainda no tabatin un huurdo y p’esey e ora claramente ora bo tin un huurdo bo por bay paden pa haci tur e cambionan necesario,” el a resalta.

Den luna di februari tambe Minister Maduro tabata presente pa e anuncio di e huurdonan di e piso abao di e monumento cu a bira Koal restaurant.

“Bo ta wak cu pasado ta trece presente, e hobennan cu ta bay sigui duna e edificio aki su historia y pesey awe sigur mi kier felicita e hobennan Pierre y Britney Koolman cu a scoge e edificio aki pa ubica nan negoshi di produccion, Cocolishi Studio,” Minister Maduro a expresa.

El a enfatisa cu e iniciativa di e hobennan ta admirabel pasobra por wak cu e hobennan no ta para keto, ta tuma e risico pa haci negoshi y ta scoge un monumento. “Un monumento tambe cu ta bay conta nan historia como comerciantenan,” el a agrega.

El a recorda cu desde 2015 a cuminsa cu trabaonan pa e edificio aki na unda a cumpra e edificio, na 2016 e edificio a ricibi su e seyo di proteccion y di eynan a sigui cana un caminda pa awe finalmente e edificio ta completamente renoba.

Pierre Koolman di Cocolishi Studio a resalta cu pa nan e ta “un honor grandi” pa nan por cuminsa un etapa nobo pa nan negoshi den un monumento.

El a indica cu e ta pensa e ta mas destino con e compania ta klop cu un monumento pasobra e studio ta tene cultura y Aruba en general den su business model, den sentido cu nan ta usa recursonan di Aruba cu ta hende, material of arte, tur cos cu tin di haber cu Aruba.

“Mi ta haya Cocolishi ta klop perfectamente den un monumento, den playa na Oranjestad. Mi kier a gradici Anne, danki pa e pasenshi y mi ta hopi agradecido tambe cu monumentenfonds a push nos hopi,” Koolman a remarca.

El a conta cu for di e prome dia cu el a drenta y wak full e edificio el a cay namora di biaha y tabata hopi emociona. “Mane cu nos a sali for di e prome meeting cu Anne nos tabata hopi emociona y e tabata un caminda toch un tiki largo, pero nos a yega, nos a logra,” el a agrega.

Koolman ta splica cu e concepto di Cocolishi Studio ta cu e ta un ‘one stop shop’. El a remarca cu e ekipo ta un ekipo hopi versatil y cada persona tin mas cu un rol den e compania.

El a sigui splica cu si por ehemplo un artista cu acerca e studio pa saca un cantica cu un videoclip, cu photoshoot te hasta propaganda, distribui esaki, Cocolishi Studio por haci esaki di a te cu z.

Ademas el a subraya cu e di e forma aki e beneficia e cliente tambe ya cu e ta sali mas economico asina na luga cu si mester busca tur servicio separa.

Koolman a indica tambe cu den futuro nan kier intercambia e rolnan di cada persona y haci tayernan interno cu e ekipo tambe. “Mi ta sinti cu si tur hende sa otro hende nan rol, bo por yuda otro miho y asina tin back up pa e diferente rolnan,” el a enfatisa.

Cocolishi Studio a habri den aña 2020, net durante pandemia. Koolman a conta cu nan a cuminsa cu e concepto di e studio den luna di maart 2020 y Cocolishi Studio a keda oficialmente registra na november 2020. A cuminsa cu dos cliente y aworaki varios aña despues e lista di cliente a sigui crece.