E proyecto di restauracion di e monumento na Steenweg 19 ta yegando su final. Despues cu e edificio a conoce varios cambio durante añanan, cu e restauracion Stichting Monumentenfonds Aruba a hiba e exterior di e edificio back na su forma original. Cu e adaptacionnan aki e edificio a haya entre otro su balcon back, decoracionnan y popchinan a bin back pero tambe e decoracion di palo conoci manera ‘Gingerbread’.

Casnan cu decoracion den estilo ‘Gingerbread’ no ta hopi comun na Aruba pero si nos tin algun monumentonan caminda por mira e influencia di e estilo arkitectonico aki di siglo 19.

E estilo conoci cu e nomber di ‘Gingerbread’ ta un estilo di e era di arkitectura Victoriano (1837-1901). Durante añanan 1830, constructornan Mericano a cuminsa interpreta e arkitectura di Renacimiento Gotico Europeo cu detayenan elabora den palo pa decora casnan construi di palo na Merca. Esaki tabata conoci tambe manera Carpinteria Gotico. E prome diseñonan tabata simpel pero mas na mitar di siglo 19 cu e invento di e “scroll” zaag a cuminsa cu e produccion den massa di palonan mas fini corta den diferente diseño. Asina a cuminsa transforma casitanan di palo simpel den casnan unico decora.

No ta tur hende tabata di acuerdo cu e estilo aki. Andrew Jackson Downing, un defensor di e Renacimiento Gotico a critica e estilo bisando cu casnan di palo di costo abao cu tabata chikito y simpel no mester ta decora cu decoracionnan elabora cu ta pertenece na villanan grandi.

A pesar di esaki e estilo a keda fuerte, principalmente den areanan residencial di Chicago durante añanan 1860. Durante un candela grandi na aña 1871 un gran parti di e casnan aki a bay perdi pero e estilo di arkitectura a sigui expande den areanan occidente di Merca. Actualmente Cape May tin un di e coleccionnan mas grandi di ‘Gingerbread Houses’ di siglo 19.

Pa locual ta e area di Caribe e estilo di ‘Gingerbread’ a haci su entrada na 1880 na Haiti. Casnan di clase halto tabatin un arkitectura unico combina cu tradicionnan local y influencianan di afor entre 1880 y 1920. Na 1895 tres hoben di Haiti ; Georges Baussan, Léon Mathon, and Joseph-Eugène Maximilien a studia arkitectura na Paris caminda nan a haya e inspiracion pa adapta e movimiento architectural di ‘Gingerbread’ segun e clima di Haiti diseñando casnan cu patronchinan vibrante y colornan yamativo. Mayoria casnan den barionan rico tabata construi den e estilo aki y despues e a expande pa e resto di e pais.

Algun caracteristica di e casnan ‘gingerbread’ ta hopi decoracion y patronchinan den forma di canchi. Randnan di dak decora cu diseñonan den palo, balconnan habri y ta pone hopi atencion na e partinan angular y vertical di e cas.

Despues di 1925 por a nota cu a cambia den estilo di arkitectura na Haiti debi na materialnan di construccion moderno y cambionan den regulacion di construccion. Pero despues di 1946 por mira casnan di clase media a adopta e estilo arkitectural di ‘Gingerbread’ atrobe.

Otro parti di mundo a adopta e estilo arkitectonico aki principalmente na e otro islanan di Caribe por haya hopi di e casnan decora te awendia.

Na Aruba, contrario na mayoria di e islanan den Caribe por haya back e decoracionnan di ‘Gingerbread’ principalmente na edificionan grandi y no na e casitanan di palo tradicional. Mayoria di e edificionan aki ta data di añanan diesnuebe binti, asina nos por haya e tipo di decoracion di palo aki na edificionan manera Stadhuis y tambe dos di e monumentonan cu ta pertenece na e compleho di Museo Arkeologico, conoci manera Cas Ecury.
Na e skina di John G Emanstraat cu Emmastraat y tambe na Bernhardstraat na San Nicolas por haya ainda algun casita di palo cu ‘gingerbread’ pero na un estilo mas simplifica.
y awor cu e restauracion di e edificio di ex Botica Aruba na Steenweg 19 a trece e decoracion aki back. Na mayoria di e edificionan e decoracion ta forma parti di e balcon of veranda di e edificio.