Stichting Monumentenfonds Aruba (SMFA) a wordo informa di e incidente lamentabel cu a tuma luga na e forno di calki den fin di siman. E incidente a sosode na un di e monumentonan cu ta pertenece na SMFA. Nan ta sumamente preocupa y ta desea pronto recuperacion pa e victima.
Situacion na e forno di calki
E problema di adictonan ambulante na e forno di calki tin hopi aña caba y ya algun aña pasa SMFA a entrega un peticion pa por cera e entrada di e forno, pero no a logra haya aprobacion pa esaki e tempo ey. Tambe ya pa algun aña nos tin un acuerdo cu FMAA pa haci e area rond di e obhetonan monumental limpi, pero asina nan caba haci e area limpi den un rato despues nan ta bolbe yena e area cu sushi.
Tambe Stichting Rancho constantemente ta haci esfuersonan pa por tene e area limpi pero constantemente e adictonan ta sigui bay na e forno di calki.
Solucion temporal
Mirando e situacion cu a surgi den fin di siman caminda cu a pone bida di un persona na peliger y tambe haci daño na e monumento, SMFA a tuma e decision pa cera e forno di calki temporalmente te ora cu esaki por wordo restaura completamente. Den e proximo dianan lo percura pa cera e entrada di un manera cu no ta haci mas daño na e monumento pero cu tampoco niun persona por drenta den e forno.
Restauracion di e forno
Manera ta obvio, e forno mester un restauracion completo. SMFA tin algun tempo caba trahando riba e plannan pa restaura esaki. Pero tambe ta en busca di fondonan pa por logra cubri e gastonan di e restauracion. Contrario na comentarionan cu nos por a lesa den medionan social, e forno no a wordo restaura ainda. E ta pertenece na SMFA y nos ta trahando riba e plannan y buscando e fondonan ainda.
Tambe mester yega na un plan pa e area mirando cu si inverti den e restauracion di e forno pero e problemanan social den e area keda mescos esaki lo trece cune cu e problemanan lo sigui unabes e keda restaura. E forno di calki ta un monumento unico den su forma aki na Aruba y e ideal lo ta pa e por bira tambe un atractivo turistico den futuro.
Actualmente SMFA ta den combersacion cu expertonan di exterior pa asina por restaura e forno debidamente pero tambe lo combina e proyecto aki cu tayer tocante tecnicanan di calki pa asina educa diferente gruponan di tanto studiantenan, profesionalnan y interesadonan en general tocante e historia y tecnica di calki utilisa den pasado na diferente di nos monumentonan. Proximamente nos lo tin mas informacion tocante e cursonan aki.
Monumentonan y adictonan ambulante
Den pasado nos por a mira ehempelnan caba di edificio y of casnan cu un balor monumental cu a core peliger di bay perdi debi na candela ocasiona pa adictonan ambulante. Nos por corda por ehempel e cas di torto na Koningstraat y Huize Veneranda (ex Papiamento Restaurant na Wilhelminastraat). Tambe recientemente e edificio di Henriquez cu ta oficina di Monumentenbureau y awor e forno di calki.
E problema di adictonan ambulante ta grandi y esaki ta afecta diferente di e monumentonan cu ta pertenece na Monumentenfonds tambe. Diferente di nos edificionan ta haya bishita di e adictonan cu ta busca un area pa drumi y tin biaha ta purba keda biba den e cura di e monumentonan. Cu esaki ta trece hopi sushedad y ta crea un situacion antihigienico. Banda di esaki tambe ta crea un situacion incomodo caminda cu trahadonan di e edificio ta sinti nan mes insigur.
Ya poco tempo pasa por ehempel Bureau City Inspector a duna un man pa por recoge sushedad den e cura di Watertoren Oranjestad, pero despues di un par di dia nan ta bolbe susha e area atrobe.
SMFA ta consciente cu esaki ta un problema social di nos comunidad cu nos mes no por soluciona pero SMFA semper ta dispuesto na sinta hunto cu e instancianan concerni pa asina yega na un solucion mirando cu esaki, tumando e ehempel di e forno di calki, no solamente ta crea daño na edificionan monumental pero tambe peliger pa e personanan mes.
